تامر عبدالمنعم يكشف مفاجأة حول دفاع فريد الديب عن قاتل نيرة أشرف
كشف الفنان والإعلامي تامر عبد المنعم، تفاصيل تقديم المحامي الراحل فريد الديب، بمذكرة نقض على الحكم الصادر من محكمة جنايات المنصورة بإعدام محمد عادل قاتل نيرة أشرف.
وقال عبد المنعم، خلال حواره مع الإعلامية أميرة بدر في برنامج "VIP" المذاع عبر شاشة قناة “هي”: "هذا نص ما حدث والراجل بين إيدين ربنا، لما عرفت أنا كلمته وقالي هو أنت هتعمل زي الناس اللي مش فاهمة وطالعة تهاجم؟ قلتله طب أنا عايز أفهم لأن ناس كتير بتسألني وكان معايا بنتي الصغيرة وهي اللي أثارت الموضوع، فقالي أنا راجل محامي ورجُل قانون، وما حدث أثناء نطق الحكم في الدائرة القضائية في القانون اللي حضرتك متعرفهوش غلط والقانون يُحاسب عليه لأن القاضي مينفعش يفصح عن نواياه".
وتابع: "وقالي أنا هقدم نقض مجاني لأني مش مستني حاجة، وأنا بدافع عن القانون وقد يتاخد بالنقض ده، قلتله طب وبعدين كده الولد هيخرج؟! قالي لأ هتتعاد المحاكمة وهياخد إعدام برضوا، وقعد يضحك".
كما علق تامر عبد المنعم، على ظاهرة التعاطف مع محمد عادل قاتل نيرة أشرف، قائلا: "فكرة إننا استحل دم فتاة كونها بشعرها وترتدي أزياء جيدة فقول كده إديتي الفرصة للمعاكسة ولما ترفض يقتلها دا جنون وجريمة في حق المرأة، ونرجع للي هو شايف أن أي واحدة مش منقبة أو محجبة حلال فيها القتل، هتعرفي مين اللي روج لفكرة التعاطف مع محمد عادل، ومنهم الوهابيين والسلفيين، ومش شرط يكون الإخوان".
وتحدث تامر عبد المنعم، عن فترة عمله كمذيع وسبب رحيله من قناة المحور، مُشيرًا إلى أنه يتمنى العودة من جديد للإعلام، ومؤكدًا أنه سيعود لقول الحقيقة كما اعتاد الجمهور.
وأوضح تفاصيل الأمر، قائلا: "بشوف نفسي مذيع ناجح لأني كنت مؤثر وكنت بقول كلام غيري مقالوهوش، كنت بقول الحق سنة 2011، قُلت خونة ومحدش صدق وطلعوا خونة، وغيري عام مع الموجة وأنا وقفت ضد الموجة، و98% من اللي كانوا بيطلعوا في التلفزيون عاموا مع الموجة وفي منهم كان شريك في الموجة، ودلوقتي غيروا كلامهم ولسة هيغيروا الكلام والأيام بيننا".
وعن سبب رحيله عن قناة المحور، قال: "مكنتش مرتاح في التعامل مع قناة المحور، وحسن راتب حاليًا مش عارف يرد عليا فمقدرش أتكلم عليه وربنا يفك أزمته ويرجع بيته سالم غانم".
وتابع: "مكنتش مرتاح مهنيًا في قناة المحور لأن كان في تدخلات وتوصيات كتير ومكنتش مرتاح وأنا معرفش أعمل حاجة غير وأنا مرتاح حتى لو هعملها ببلاش، وكان في مجاملات كتير لهن ويُقال عنهن جنس لطيف ولكن هل هن فعلًا جنس لطيف؟ ولو كان جنس لطيف مكنتش مشيت".
وأضاف: “في مذيعات كتير على الشاشة مكنش ينفع يطلعوا، وكان في تكتيفات كتير وأنا بحب أكون بحريتي، وكمان كان فيه اتفاق مع قناة العاصمة كنا بنطلع بالتجربة بتاعتها وكنت مرتاح فيها أكتر”.
ورد تامر عبد المنعم على حديث الإعلامية أميرة بدر: “الناس كانت بتشوفك مذيع دمك تقيل؟، قائلًا: ”أنا مكنتش طالع أضحكك أنا كنت طالع أقولك الحقيقة، وفي بعض الإعلاميين والإعلاميات بيطلعوا جهلة ومبيعرفوش يقولوا كلمتين على بعض".
وأعرب تامر عبد المنعم، عن رغبته في العودة مرة أخرى لتقديم البرامج التلفزيونية، قائلًا: "نفسي أرجع لكرسي المذيع تاني، ولكن هرجع أقول الحق اللي ينفع بلدي، وأكيد مش هطلع أقول ادبحوا حمير لأن أبو حنيفة قال عليهم كويين أوي، وأكيد هكون في صف الناس والمذيع لازم يكون في صف الناس، والمذيع لازم يكون له وجهة نظر، آه الإعلام لازم يكون حيادي لكن دا في الخبر، لكن المذيع اللي له برنامج لازم يكون له وجهة نظر ويدافع عنها".
واختتم حديثه: "الشاعر سنوميدس دا شاعر إغريقي قال هزمناهم ليس حين غزوناهم، وإنما هزمناهم حين أنسيناهم تاريخهم وحضارتهم، الجملة دي أثرت فيا جدًا من سنين، واعرفي تاريخك وحضارتك قبل ما تطلعي تٌطرشي الطراش اللي بنشوفه في 85% من البرامج للأسف".
