حسن شاكوش: بقالي كتير مبصليش واتعملي أعمال بالشلل
أطل مطرب المهرجانات حسن شاكوش، على جمهوره عبر حسابه الرسمي بتطبيق إنستجرام، وكشف تعرضه لأذى كثير في حياته وصل لعمل أعمال له بالشلل والموت.
وقال حسن شاكوش في لايف عبر حسابه: أنا اتأذيت كتير جدًا وحياة ربنا في ناس كانت بتأذيني لدرجة الأذى اللي يموتني وكان بيتعمل لي أعمال بوقف الحال وبالشلل وأعمال أني أموت نفسي أو انتحر، بس الحمد لله لأني قريب من ربنا ما حصليش حاجة، ومش شرط علشان قريب من ربنا أني أكون بصلي، لأ أنا بقى لي كتير جدًا مش بصلي.
وأضاف: ما كانش حد دريان بيا وأنا كراجل مطرب لو فيا هموم الدنيا كلها بطلع على المسرح يضحك ويرقص ويعمل كل حاجة علشان شغله وأكل عيشه وما ينفعش أدخل مشاكل خاصة في الشغل لأن الناس اللي جايبينك شغل ودافعين فلوس مالهمش دعوة بمشاكلك.
وتابع: وأنا الحمد لله مراضي أمي وأخواتي وأهلي ورضا الأم من رضا الرب، ويستحيل تكون وحش مع أهلك وغبي، وهما يحبوك، وربنا هيكرمك.
واستكمل حسن شاكوش: ليه باصين ليا في الفرحة اللي بفرحها، أنا كنت لاعب كورة بنام تحت المدرجات وكنت في السويس بشرب مياه تجيب فشل كلوي علشان مش معايا أجيب مياه معدنية، وربنا خلق الناس طبقات مش كل الناس طبقة واحدة وأنا مش في يوم وليلة بقيت حسن شاكوش وكان بقى لي 12 سنة بلعب كورة، وكنت بنام على الأسفلت وكان معايا كاوتش باتا بخيطه خمسين ألف مرة علشان ما كانش معايا، وعمري ما قلت لحد أديني جنيه.
وأردف حسن شاكوش: لما بشوف حد معاه بقول يمكن ربنا كرمه علشان يصرف على حد مريض عنده وأنا مش بحب أطلع وأتكلم ومش عاوز أقول والدتي عندها كانسر ومش بحب الكلام ده ولما بشيل بحط في نفسي ومش بشتكي وعمري ما اشتكيت أني موجوع أو تعبان ولكني بعيط في أوضتي وكنت حاسس إن ربنا هيكرمني.
