مبحسش إنه بيحبني.. منة فضالي باكية: والدي سابني وأنا عندي شهرين
تحدثت الفنانة منة فضالي عن طفولتها، ومعاناتها بسبب عدم وجود والدها في حياتها، والذي تركها عندما كانت طفلة رضيعة ولديها شهرين فقط، الأمر الذي جعلها تنهار من البكاء.
وقالت خلال حديثها مع الإعلامية أميرة بدر في برنامج “Vip” المذاع على شاشة “هي”: “طبعا كان بيأثر في بداية طفولتي إن والدي مش موجود، ولكن ماما كانت مالية الفراغ، وشغلالي دماغي ومش بقعد في البيت لوحدي، وجدتي وجدي وخلاني معايا ديمًا، ولما كنت بسأل عن بابا كانت بتقولي ماما: مسافر وشغله بره مش موجود”.
علاقة منة فضالي بوالدها
وتابعت: “عارفه شكله وبشوف صوره، كنت بشوف زمايلي في المدرسة بيبقى معاهم باباهم ومامتهم وأنا معنديش بابا وكان بيضايقني الموضوع ده جدًا، ولكن اختلف الموضوع لما كبرت بقيت أشوف الدنيا بشكل تاني”.
وواصلت: “الموضوع صعب جدًا بالنسبة للبنت لأن البنت بتحتاح لسند ولحضن يحسسها بالأمان، ولما يبقى عندها مشكلة في المدرسة ترجع لباباها مش مامتها، كنت ديمًا بلجأ لجدي وهو كان مدلعني أوي وأنا صغيرة، حتى لما كنت بتعب بنده لماما واقولها: عايزة أشوف بابا، طبيعي كانت واحدة صغيرة في مدرسة عايزة باباها”.
واستطردت: “كنت بتكلم مع بابا وأنا صغيرة بس كل فين وفين، وكان بيقولي مشغول ومسافر وعندي شغل، مكنتش هفهم الكلام ده، وأنا صغيرة بس كنت بتضايق وأنا كل شوية بسأله هتيجي امتى؟ وأنا مكنتش أعرف إنهم منفصلين، سابني وأنا عندي شهرين أو تلاتة، أنا نفسي أعرف ليه؟ بس خلاص متأخر دلوقتي وعمري ما حسته بيحبني”.
واستكملت: “لما كبرت وبدأت أشتغل عرفت إن ماما اتطلقت وعرفت بعد وقت طويل، هي كانت أول زوجة له، وقعدوا مع بعض 12 أو 13 سنة، أنا جيت بعد معاناة طويلة لماما في الخلفة لأنها كانت بتسقط كتير جدًا، وتعبت عشان تجيبني وجالها حمى نفاس وكانت هتموت وحاجات كتير، أمي مرتبطة بيا زيادة عن اللزوم وأنا كمان، ماما وبابا كانوا بيحبوا بعض جدًا ولحد دلوقتي فيه بينهم احترام، ووالدي من عيلة كبيرة جدًا، مثقف ومتعلم تعليم عالي، وطباخ كويس جدًا”.
واختتمت منة فضالي حديثها: “الأول كان الموضوع بالنسبة لي كره عشان كان موجود ومش موجود، ولكني كنت شايفة إنه مش موجود بإرادته، وإنه كان موجود وهو اللي مش عايز يكون موجود كانت تعباني نفسيًا”.
الجدير بالذكر أن برنامج «vip» يعرض على شاشة «هي» يوميًا في شهر رمضان في تمام الساعة 11 مساءً، كما يعاد عرضه في اليوم الثاني في تمام الساعة 3 صباحًا، والساعة 10 صباحًا.
موضوعات متعلقة
