رضوى الشربيني: أنا عدوة أشباه الرجال وقسيمة الطلاق مش وجع

حلت الاعلامية رضوى الشربيني ضيفة الأعلامية منى عبد الوهاب، مقدمة برنامج "انا والقناع"، وأكدت أنها ليست عدوة الرجال، ولكنها عدوة أشباه الرجال المنتشرين في المجتمع قائلة " أنا جيت في الدنيا بسبب راجل وهو أبويا وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل".

تصريحات رضوى الشربيني 

وأضافت رضوى الشربيني: "اللى بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل".

وأشارت رضوى الشربيني إنها صادفت الحب الحقيقي عقب انفصالها، مؤكده إنها قصة وانتهت قائلة "قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها إنتهت وانا مبحبش اتكلم عن القصص اللي انتهت بسبب اننا اتفقنا اننا لا نتفق".

مواصفات الزوج الذي تتمناه رضوى الشربيني

قالت رضوى الشربيني: "لازم يكون راجل قادر والقدرة هنا بمعنى انه يكون قادر على العفو عند المقدرة عشان مبيصش على أخطائي ولا صغائر الأمور اللي انا بعملها وهيكبر دماغه ومش هيتلككلي ومش هيبص على عيوبي، ولازم يكون قوي ويشاركني كل أموري ويكون سند وقوته دي تكون معايا مش عليا ولما يقرر انه مش عاوز رضوى الشربيني مبعملش اي حاجة غير انه هيجبني ويقولي في وشي انا اسف من قادر أكمل".

وتابعت رضوى: "لازم يكون ناجح مقدرش اتجوز راجل مش ناجح ولا أنا اكون أنجح منه، ويكون عنده طموح ويتقي ربنا في البني آدمين ومكونش انا اولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش اتجوز راجل دمه تقيل ابداً، ويكون شيك وخفيف في نفسه".

واستطردت: "الحياة بعد وفاة امي اختلفت كتير وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي.

وأَضافت رضوى إنها لم تشعر بالوجع عندما امسكت ورقة طلاقها بيدها مؤكده أن رصيدها في بنوك الوجع أكثر بكثير من قسيمة الطلاق حيث قالت عن تجربتها "اكتشفت نفسي ولقيت اني انسان مش قابل يعيش العيشة دي، ورصيدي في بنوك الوجع اكثر بكثير من قسيمة طلاق، ومقدرش اعد الاوجاع دي".

واضافت "قسيمة الطلاق مش وجع انما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الاوقات كلمة انتي طالق بتوجع، خصوصاً اذا كان عندك قناعة إن الكلمة دي هي دوامي مش وجعك".