روجينا: جاتلي حالة نفسية بعد حلاقة شعري في "ستهم"

كشفت الفنانة روجينا، خلال لقائها مع برنامج ET بالعربي، عن كواليس تحضيرات شخصية ستهم، التي تجسدها خلال أحداث مسلسل ستهم، الذي يعرض في السباق الرمضاني الجاري 2023.

وقالت روجينا : "لكل مجتهد نصيب وردود الفعال جميل جدًا على الشخصية لأنها شخصية حقيقية من المجتمع، والناس متأثر بالست المصرية اللي اتظلمت ولبست توب الرجال ونزلت تشتغل والمجتمع بيرفضها وبيقهرها، ودي رحلة صعبة على أي ست أنها تخوضها، أنا لما جربت التجربة دي، سيبت ستهم وبقيت أنا روجينا بتفرج على الست دي".

روجينا تحلق شعرها

وأضافت روجينا: "أول ما صورنا الصورة من غير شعر اللي نزلت من شهور، عملنا مشهد الحلاقة وبالفعل أنا حلقت شعري، واتكتب مشاهد وستهم من غير شعر وأنا كان شعري بدأ يطلع، قولتلهم مش هقدر أحلق شعري تاني، وهما كانوا عايزني طول المسلسل زي الرجالة كل ما شعري يطلع أحلق، قولتلهم أنا حلقت مرة ومهمة حصل مش هقدر أعملها تاني".

روجينا تعاني من حالة نفسية بسبب مسلسل ستهم

وتابعت روجينا، قائلة: "جاتلي حالة نفسية بعد الحلاقة ومش قادرة أشوف نفسي في المراية، في البيت بقيت مسار سخرية، وبيقولوا علشان تعملي شخصية عملتي كده في نفسك؟ وأنا حسيت إحساس وحش بصراحة ورفضت أحلق شعري تاني، وبحط شعر مستعار لو في أي تكريم أو مناسبة".

أصعب مشاهد التصوير في مسلسل ستهم

كشفت روجينا عن أصعب مشاهد مسلسل ستهم، قائلة: "أصعب مشهد صورته في مسلسل ستهم كان مشهد موت الابن، كان صعب جدًا عليا وبعد ما خلصت المشهد اترميت في الأرض وجالي حالة هيستريا، ولغاية دلوقتي مش مظبوطة نفسيًا وعندي حالة من الظلم والقهر جوايا، وعندي ردود أفعال للأشياء زي الرجالة".

وتابعت: "وأنا بضرب الراجل في الجبل كنت عايزة أثبت إني جامد واتضح إن الزجاجة اللي مسكاها في المشهد حقيقية وفتحت راس الراجل ووقعت أغمى عليا".