زينة: قالوا على وشي معضم ودلوقت بقى هو الموضة

قالت الفنانة زينة إن لديها قناعة شديدة، بجمال ملامح وجهها، وترفض المقارنة بينها وفتيات أوروبا، مؤكدة على أنها ترى نفسها أجمل منهن بملامحها.

وأضافت خلال لقائها ببرنامج “مساء dmc”، من تقديم الإعلامية إيمان الحصري: أنا لما بسافر برة بشوف بنات صواريخ، وأختي تقول لي بصي، الله على لون شعرها ومش عارفة إيه، بس أنا مقتنعة من جوايا إني أحسن منهم، أنا دايمًا شايفة نفسي أحلى من أي بنت حتى لو صاروخ رغم إني منكوشة".

ولفتت: "أنا راضية بشكلي وعاجبني، بس ساعات بقول: بس هي لو عملت مناخيري شوية هبقى أحلى، بس برجع وأقول: لأ لأ أنا كده قمر".

وأكملت: "أنا راضية بكل حاجة ومبسوطة بشكلي أوي وما بحبش أغيره، ولما دايمًا يقولوا لي اعملي نيولوك وقصي شعرك برفض لإني موافقة على شكلي ومبسوطة بيه، وكانوا زمان بيقولوا عليَّ دي زينة، دي وحشة أوي ووشها معضم، دلوقتِ بقوا يسافروا يعملوا وشي، فعلًا وشي بقى موضة".

زينة وأولادها التوأم

وتطرقت زينة للحديث عما تغير فيها بسبب الأمومة، وقالت: قبل وجود أولادي كنت بشتغل عشان أشتري جزمة أو شنطة ومكنش عندي أي مسؤوليات، ودلوقتي أولادي أولوية عندي، مضيفة: ممكن أعيش ببيجامة أو ترنج بس أوفي بكل التزاماتي تجاههم.

وأضافت زينة: أنا حاليا كائن بيتوتي خاصة بعد ما تحملت مسؤولية أولادي، ولكن بحب أعيش حرة وطليقة ولا أقبل فرض أي شيء علي.

وأكملت: أولادي التوأم كل واحد بيعيش في غرفة منفصلة، خاصة لو واحد فيهم عيان، خوفًا من نقل العدوى لشقيقه، مضيفة: لما واحد منهم بيتعب بينام معايا فالتاني بيتعدي مني.

وتابعت: "أولادي بيحبوا اللاعب محمد صلاح أكتر مني، أنا فخورة بنجمنا محمد صلاح ونفسي ولادي يطلعوا زيه".

واختتمت: بخاف من الحسد خصوصًا على أولادي، مضيفة: "ليا مع الحسد حوادث كتير، بس أنا مسلماها لربنا، وبكتفي بقراءة القرآن".