محمد سامي بصحبة بطل الملاكمة نسيم: اتفاجئت إنه عارفني.. ومسلسل "البرنس" على اسمه

شارك المخرج محمد سامي صورة نشرها خلال حسابه الرسمي على موقع تبادل الصور والفيديوهات الشهير إنستجرام، ظهر فيها بصحبة الملاكم نسيم حميد.

سبب تسمية مسلسل البرنس بهذا الاسم 

وكشف محمد سامي عن سبب إطلاقه اسم البرنس على مسلسله بطولة محمد رمضان، وأعرب عن سعادته الشديدة لمقابلة الملاكم، معلقًا:" لما ألفت مسلسل البرنس سميته البرنس من كتر حبي من وأنا صغير للبرنس نسيم حميد بطل الملاكمة  اللي مبسوط أوي إني قابلته النهاردة".

وأضاف محمد سامي:" اتفاجئت إنه عارفني وعارف مسلسلاتي، أحلامك وانت طفل ساعات تحققها وانت كبير".

محمد سامي يلتقي الملاكم نسيم

وتحدث محمد سامي عن سعادته الشديدة للتعاون مع الفنانة هالة صدقي في مسلسل جعفر العمدة، قائلًا: "هالة صدقي أستاذتي الموهوبة الخلوقة اللي كانت لمانا كلنا في حضنها، وهي العمود الفقري للمسلسل، كان معانا خبرة وأخلاق وزوق، وبشكرها إنها يوم ما قلتلها تعمل دور أم لناس كبيرة سنا وافقت وقالت أنا ممثلة، هي ست جميلة وخفيفة الظل ويا بختي إن يتحط في تاريخي إني اشتغلت معاها، ومن حق الممثلين أصحاب القدرات دي إنهم يتعاملوا مع ناس تقدر تطلع القدرات دي منهم".

تصريحات محمد سامي 

وكان قد رد المخرج محمد سامي، على ما أثير من جدل بشأن خلافاته مع الكثير من الفنانين الذي يعمل معهم، وأسباب إنفعاله عليهم أثناء التصوير.

وقال محمد سامي خلال تصريحات تلفزيونية: "لما بتعصب على ممثل بيبقى يا إما هو بليد، أو مواعيده مش مظبوطة، أو مش بيذاكر ولا بيحفظ، وده طبعا بيعطل زمايله".

وأضاف سامي: "هو كده هيفشل ويفشلنا معاه، ويبقى ممثل جاي متأخر ومش مركز ويسلب حقوقنا كلنا، وبتخانق معاه مهما كان مين ونجوميته قد إيه؛ لأن النجوم الحقيقيين أصلا محترمين، وعمري ما اشتغلت مع نجم كبير ومكنش محترم، دايما المشاكل بتيجي من أنصاف الفنانين".

وتابع: "أنصاف الفنانين اللي بييجي من وراهم مشاكل، بيبقى عايز طول الوقت يقول أنا نجم، فمش بيفكر في الشغل نفسه، ونجم زي محمد رمضان وأحمد السقا دول ناس تعلم جيدا إنهم نجوم وناجحين، فبيركزوا في شغلهم".

وأردف محمد سامي: "والنجوم دول أول ناس بتيجي في ميعادها، وأكتر ناس مذاكرين وعندهم حرص على نجاح المشروع، زي الفنانين عادل إمام، والراحل محمود عبد العزيز، وأحمد عز، فالمشاكل بتيجي من الناس اللي بتبقى فاكرة إنهم نجوم وبيحاول يثبت ده برغم إن دوره مش هيأثر على بيع العمل بدولار واحد حتى".

ورد المخرج محمد سامي علي تصريحات الفنانة زينه، بعدما قالت أنها لن تتعاون معه مجددا، بعد تجربتها في مسلسل جعفر العمدة، وقال :" طريقة شغلي مانسبتش قدراتها او موهبتها التمثيلية ، انا متعب في شغلي وبحب الناس تذاكر زياده وتحضر في مواعدها ممكن يكون دا بيوترها ".