أحمد عبد الله: مشهد ضرب سيد من أهم كواليس "جعفر العمدة"

كشف الفنان أحمد عبد الله عن كواليس مشاركته في مسلسل جعفر العمدة بطولة الفنان محمد رمضان، والذي عرض في السباق الرمضاني الماضي 2023، والذي جسد فيه دور كارم فتح الله، وحقق بدوره نجاحا كبيرا.

كواليس تصوير مسلسل جعفر العمدة 

وقال أحمد عبد خلال في لقاء تلفزيوني: "من أهم الكواليس مشهد ضرب سيد العمدة لأننا كنا بنصوره في الشتا الساعة خمسة الفجر ودرجة الحرارة في مدينة الإنتاج كانت صفر، وكنت ببص جنبي على هالة صدقي ألاقيها واقفة 16 ساعة ومتأثرتش فكنت بقول لنفسي اختشي بقى".

كواليس مسلسل جعفر العمدة

وأضاف أحمد عبد الله: "الكواليس بينا كانت عاملة زي فريق الكورة اللي عاوزين يجيبوا كأس العالم، ولو حد شاف حد أدائه بره المود يقول له لو النصيحة ما جاتش المشهد هيطلع وحش، وممكن ممثل يعليك وممثل يوقعك".

أحمد عبد الله يتحدث عن محمد رمضان  
وتحدث أحمد عبد الله عن محمد رمضان قائلا: "كاريزما طاغية ومشاهدي معه كلها كانت ماستر سين، ولو أدائي مش على قد نجم زي محمد رمضان هتكشف".

وعن محمد سامي، قال: "عنده المقدرة يدخلك اللوكيشن وأنت بتضحك ولو عاوز جو تنشنة يزعق علشان يوصل لك للمود ده، وأكتر مشهد كوميدي لما محمد رمضان دخل بزينة على زوجاته وهو متجوزها، ومحمد سامي بيعشق الممثل".

تصريحات أحمد عبد الله 

وتابع أحمد عبد الله: "وإحنا بنقرأ اسكريبت المسلسل كنا شايفين الشخصيات بتمشي من كتر جمالها، المشاهد الصعبة بدأت مع مشاهد الأكشن في الحلقة 4 بداية من المعركة بين جعفر العمدة وكارم، اللي اتضرب فيها كارم، ومشهدي مع ثريا".

وواصل: "مشهدي مع ثريا لما كارم استغلها واستغل فراق ضناها وطلب منها تبوس إيده ده مشهد فيه قسوة شديدة، والمشهد ده يعتبر انتصار للست المصرية وخد 10 ساعات تصوير".

وذكر أحمد عبد الله أنه حصل على العديد من التعليقات الرائعة على دوره، في تقديم شخصية كارم فتح الله، قائلا: “أجمل كومنت بسمعه لما يقولوا لي مستحيل أنت تعمل الشر ده”.