والد زوجة حسن شاكوش لـ "مصر الآن": بيهددني إن القانون معاه وهيبعتلي ناس في بيتي
أعرب طارق السيد، والد ريم طارق، زوجة مؤدي المهرجانات حسن شاكوش، عن استيائه الشديد من الأزمة التي اندلعت بين ابنته وزوجها شاكوش خلال الفترة الماضية، ولا سيما بعدما تقدم الأخير ببلاغ ضدها واتهمها بسرقة نصف مليون جنيه.
تصريحات طارق السيد والد ريم طارق زوجة شاكوش
وقال "طارق السيد" في تصريحات لـ"مصر الآن": موصلنيش أي حاجة رسمي عن البلاغ ده، اللي قدمه شاكوش ضد ابنتي، ولكن رسالتي له العدل فوق الجميع وهرد عليك من خلال القانون، والعدالة هتأخذ مجراها.
وأضاف: ملغتش فكرة إقامة مؤتمر صحفي نهائياً، وموجودة في بالي وهنفذها، وهدفي الوحيد من المؤتمر هو حصول بنتي على العدل بعد الأزمة.
وتابع: مش هكشف خلال المؤتمر أي سر بينها وبينه ودي الأصول، ولكن عاوز أقول للجميع وأوصل رسالة لهم بأنني أتعرض للتهديد من حسن شاكوش.
وأوضح أنه تلقى رسائل تهديد صعبة من شقيق حسن شاكوش، قائلاً: "الرسالة كلها بتأكد أن القانون تبع حسن شاكوش ومعاه وبتاعه، وإنه مسيطر على الكل، وكمان بيأكدوا على أني لا هعرف أخد منه حق ولا باطل.
واستطرد: مش بس كدا، دول هددوني بأنهم هيبعتولي ناس في بيتي وطبعا شتايم صعبة جدا، مقدرش أنطق بيها ولا أقولها، شتايم مش كويسة وحجات لساني ميقدرش يقولها، وعشان كدة أنا قدمت بلاغ ضده.
وأردف: الإشاعات اللي بيروج لها عن إن بنتي أخفت جوازها من راجل قبله مش صح، وسؤالي هنا هل حد يقدر يخبي حاجة زي دي، بالتأكيد لا، وأنا بقوله روح قدم في النيابة وقول الكلام دا وأنا وقتها هرد عليك وأحاسبك.
وعما إذا كان يتوقع هذه التصرفات من زوج ابنته شاكوش، أكد: مكنتش أتوقع كدة أبدا، لكن أنا في نفس الوقت مش ندمان خالص اني جوزتهاله، أصل هندم على ايه، ربنا ابتلانا ولازم نصبر وكله هيعدي.
واختتم: بنتي مش زعلانة خالص، بالعكس دي سعيدة ومبسوطة لأنها بتحمد ربنا إن الحكاية جات لحد كدة وربنا منع عنها مشاكل أصعب وأكتر من كدة، وموقفها بقى من الطلاق أو الصلح أنا هرفض أوضحه لأن دي أسرار بيوت ومينفعش أتكلم فيها.
زوجة حسن شاكوش تحرر محضرا
وتلقى اللواء محمد الشرقاوي، مدير الإدارة العامة للمباحث، إخطارا من العقيد عمرو حجازى، مفتش المباحث، يفيد فيه بحضور ريم صادق -28 سنة - ربة منزل ومقيمة داخل كمبوند شهير، إلى القسم لتضررها من زوجها حسن منصور وشهرته «حسن شاكوش» لقيامه بطردها من منزل الزوجية منذ أيام والاستيلاء على المنقولات الزوجية وشبكتها وإيصال أمانة لصالحها بديل مؤخر الصداق.
وقالت إن الخلاف منذ فترة وعللت تأخيرها في تحرير محضر أملا في الصلح بينهما، إلا أنه قام بإرسال رسالة لها برغبته في إنهاء العلاقة الزوجية، فقامت على الفور بتحرير محضر له اليوم وطلبت إثبات الحالة.
ومنذ ساعات، حرّر المطرب الشعبي حسن شاكوش، محضرًا باستيلاء زوجته ريم طارق على نصف مليون جنيه، والهروب من المنزل بمجوهراتها.
