نغم إمام: علاقتي بـ "الزعيم" قديمة.. وهذه أمنية حياتي

اعتدنا من الموسم الدرامي الرمضاني خلال كل عام، أن يعطي قبلة الحياة لعدد كبير من المواهب الفنية، من أجل إثبات أنفسهم، كما يفتح المجال لهم للمشاركة في العديد من الأعمال الجديدة، والتي تكون بمثابة انطلاقه حقيقية لهم.

وكان من أبرز هولاء النجوم الفنانة الشابة نغم إمام، والتي حققت نجاحات كبيرة خلال الماراثون الرمضاني المُنصرم 2023، من خلال مشاركتها بمسلسل "إكسلانس" بطولة النجم محمد سعد، ولاقى دورها إشادات كبيرة.

تصريحات الفنانة نغم إمام 

وبعد نجاحها في شهر رمضان الماضي، أكدت نغم إمام، أنها عاشقة للفن والتمثيل منذ الصغر، وأنها كانت تتدرب على التمثيل أمام المرآة وتقوم بتجسيد المشاهد.

وأضافت خلال حلقتها في برنامج نهارك سعيد، المذاع عبر شاشة قناة نايل لايف، :"من وأنا صغيرة وأنا بعشق الفن والتمثيل، وإني أقف قدام مرايا وأعمل مشهد، كبرت وحسيت إني لازم أمثل، أول حاجه بدأت بيها هو مسلسل راجل وست ستات الموسم التاني، قدام أستاذ أشرف عبد الباقي، حسيت برهبة الكاميرا، هو كان دور صغير بس فرحت بيه".

بداية المشوار الفني لـ"نغم إمام "

وتابعت: "تاني مرة محستش بالرهبة وكنت بنتظر كلمة أكشن، كنت بسعى في الموضوع وربنا كرمني بحلقة كاملة في بيت العيلة، كنت فرحانة ومخضوضة، وربنا كرمني واتوفقت فيها، كانت سعادة كبيرة ليا".

وأردفت: بعدها اشتغلت في صوت القاهرة وأخدت ورش كتير جدا، لأن الفنان من غير دراسة مش هيصقل نفسه، وأنا بتفرج بذاكر واتعلم، ومن النجوم اللي بعشقهم حنان مطاوع بحبها جدا وهي مدرسة كبيرة، ليها كل الأولوية إني اتابعها".

نغم إمام: كنت بحب أقلد عادل إمام وأنا صغيرة 

واستطردت حديثها: "كنت بحب أقلد عادل إمام وأنا صغيرة من كتر ما كنت بحبه، بعشق وفاء عامر وإلهام شاهين اللي شجعتني جدا، وقدمت دور في مسلسل الخفافيش 4 حلقات مع الفنانة عبير صبري، وأثبتت وجودي فيه، كل خطوة كنت بتقدم للأفضل، وجاتلي فترة قعدت في البيت".

وأوضحت: "قعدت كذا سنة في البيت وتعبت جدا نفسياً، سعيت وقتها في كل حته، بس الدنيا وقفت معايا جدا، ولما رجعت حسيت إن في خير ربنا شايله ليا، وبعدها اشتغلت مشهد في طلقتك نفسي، كان ورقتين وقدامي ربع ساعة وابقى جاهزة، والدنيا بعدها بقت تمشي خطوة خطوة، لحد ما اشتغلت فيلمين مع بعض في شهر مايو".

وعن الممثلين التي تحب التمثيل معهم، كشفت: "محمد سعد أول مره في حياتي التقي بيه، عنده ليونه جدا في التعامل، بيشجع الواحد وقعد يقولي انتي شاطره وهتبقي حاجة كبيره، ومعترضش ع الإرتجال، وقدمت دور في مسلسل في الهوا سوا كنت شخصية كيادة".

الأفلام التي شاركت بها نغم إمام 

وعن الأفلام التي شاركت بها: "شاركت في فيلم مع سامح حسين إخراج أستاذ سامي حمدي، هو متواضع جدا وعنده هدوء في التعامل والفيلم اسمه سندوتش عيال، في دور زوجة ثانية للفنان إسماعيل فرغلي، طلعوني كيادة وشريرة، وفيلم مستر إكس بطولة إلهام شاهين وهنا الزاهد وأحمد فهمي".

وذكرت: "المسرح اشتغلت مرة واحدة وكنت بسعى ليه علشان اثبت كفائتي، ف قدمت دور في مسرح الجريمة مع المخرج محمد علام، والحمدلله أثبتت وجودي، المسرح أصعب فرع في التمثيلء مكنتش بتابع عيون الجمهور كنت بركز في الدور، حتى صحابي اللي بيقولولي أن الجمهور سقفلي، ولما أستاذة عبير فاروق جالها تصوير أنا اللي شلت الدور، وطلعت حافظة الكلام كله وانا مش واخده بالي".

واختتمت نغم إمام: "أمنية حياتي أعمل دور مركب ومعقد أوي، والفيلمين من أهم الأعمال اللي شاركت فيها وفرحانه بيها جدا، والناس قالتلي إنتي هايله وبتعرفي تلوني، وتعبري عن الشخصية".