بعد نفيها واتهامه بالرشوة.. نزار الفارس لـ "مصر الآن": مستغرب من كلام حورية فرغلي جداً
فتحت الفنانة حورية فرغلي، النار على الإعلامي العراقي نزار الفارس، وذلك بعد الجدل الذي أثاره بعد إعلان خطبتهما أمس، وأكدت أنها تأذت نفسيا بسببه وأنه عرض رشوة على مساعدها حتى يقول إنهما مخطوبان.
وعلقت خلال تصريحات متلفزة قائلة: “ أنا نفسيا مش كويسة، وحاسة إني عايشة في كابوس من أول امبارح مش حاسة إني عايشة في دنيا حاسة إني في غابة".
نزار الفارس يردّ:
ورد الفارس خلال تصريحات خاصة عبر "مصر الآن"، على اتهامات حورية فرغلي ضده، مؤكداً أنه مندهش جداً من كلامها ورد فعلها تجاهه.
وأضاف الإعلامي العراقي نزار الفارس: مستغرب ومندهش جدا من كلامها، والحلقة موضحة كل شي وكانت موافقة، لكن على كل حال أنا بكل تأكيد بتمنالها السعادة بحياتها والتوفيق.
حورية فرغلي ترد على نزار الفارس:
وأضافت حورية في مداخلة هاتفية لبرنامج “ملفات” تقديم الإعلامية أميرة بدر على شاشة “هي”: “ده مذيع بقاله أسبوعين بيحاول يعمل معايا لقاء وقالي إنه عراقي، أنا كنت شفت لقاءه مع رانيا يوسف مرة، قولتله أوك، وصوروا عندي في البيت”.
وأوضحت: أولا الأسئلة اللي جاي يسألها لي أنا مستغربة أنه بيسألها تاني، وهو جاي عنده خطة معينة جاي مرتب لها، وبعد ما خلصنا سألني بتحبي ماجد المهندس وأنا قولتله عادي معرفوش أوي، فقالي هسمعك أغنية وطلب مني أتصور وأرقص معاه، وكل اللي حواليه بيلموا المعدات والكاميرات، ومعرفش مين بيصور، ومرضتش أكسفه ولكن قولتله مش هيبقى حلو أنا طويلة ولابسة كعب وهيبقى منظري مش حلو".
وتابعت: “المذيع مكنش صريح معايا.. إزاي حد يقابل حد بعد خمس دقايق يقوله عايز تتجوزه؟ هو عشان أنا عندي مشكلة في مناخيري يبقى غلبانة بقى ويحصل فيا كده؟.. هو سألني وقالي أنتي متجوزة قلتله لأ أنا سنجل بقالي فترة كبيرة، ومش فاكرة الكلام ده كان جوه الحلقة ولا براها؟”.
ونفت الفنانة حورية فرغلي ما تردد حول اتفاقها مع المذيع العراقي لتصدر تريند مواقع التواصل الاجتماعي، عن طريق خطبتهما، أوضحت: "أكيد مش متفقة معاه على تريند يعني هوأنا اللي رحت له العراق، واتفقت على اللقاء وبعدين أنا مش محتاجة، كان مريب وهو من أول ما دخل كان غريب وبيصور كتير، ومعنديش أي مشكلة الحلقة تنزل، عشان الناس هتعرف كده متفقة معاه ولا لأ".
واعتذرت الفنانة لجمهورها، قائلة: “أنا آسفة وأنا غلطانة أني دخلته بيتي وهو جاي عايز يعمل تريند، وده حتى كلم أشرف المساعد بتاعي وعرض عليه فلوس عشان يقول إننا اتخطبنا فعلا".
