أحمد عزمي: حاولت الانتحار.. وباسم سمرة خطفني وحبسني 4 أيام لهذا السبب
أعرب الفنان أحمد عزمي عن حزنه الشديد بسبب وفاة شقيقه، ما أدى إلى إدمانه الكحول، ومروره بأزمة نفسية صعبة.
تصريحات أحمد عزمي
وقال أحمد عزمي، أثناء استضافته في برنامج واحد من الناس للإعلامي عمرو الليثي:" مريت بمرحلة صعبة وقاسية في حياتي؛ وهي مرحلة الإدمان، وبدأت إدمان الكحول حتى أهرب من واقع أنا عايشه بعد مقتل حمدي أخويا، وكان جوايا غضب شديد، واشتريت شقة في شرم الشيخ واتعرفت على ناس أخدتني إلى طريق الإدمان".
إدمان أحمد عزمي
وأضاف أحمد عزمي: "شقيقي تعرض لحادث سرقة وحاول الدفاع عن نفسه وماله، ولكنه قتل مطعونًا بـ 13 طعنة، كنت بصور فيلم الشوق مع خالد الحجر في إسكندرية وكنت عمري ما بشرب أثناء التصوير، وشربت وأنا بصور وفقدت أعصابي، أنا والدي من عمال المهنة، وكنت دايمًا بحافظ على صورته في الوسط الفني".
باسم سمره يخطف أحمد عزمي
وعن أقرب الأصدقاء له، قال أحمد عزمي: "باسم سمرة من أقرب الناس لي، وشك في وقت إني مدمن كوكايين وجالي هو وشقيقه البيت وخطفوني، وحبسني في البيت عنده 4 أيام، علشان يتأكد إني مش مدمن كوكايين، وقولتله أنا مدمن كحول فقط، وأنا كنت محتاج صدمة علشان أرجع عن الطريق اللي أنا ماشي فيه، وكان الحبس هو البداية إني أفوق تاني، وأنا كنت مسميها قرصة ودن".
واستكمل أحمد عزمي: "زوجتي طلبت الخلع بعد حبسي، ومضيت على خطاب المحكمة وأنا بضحك، وأنا كنت خارج عن السيطرة، وهي كانت خايفة على آدم ابني مني".
واختتم أحمد عزمي: "زوجتى قطعت كل وسائل التواصل بينا بعد الحبس واللي كان بيحضر الجلسات والدي، والنهاردة أنا بقول اللي هي عملته كان الصح وهي حمت آدم مني، وأنا فكرت في الانتحار، وأقدمت عليه، وحاولت أقطع شرايين إيدى وده حرام، وكنت يائس جدًا وقت الطلاق، حتى الدكتور قال لي أنت مفتري قاطع إيديك الاثنين".
بداية شهرة أحمد عزمي
وتابع أحمد عزمي: "كانت بدايتي مع إذاعة صوت العرب في برامج الأطفال، وكنت بقول إشعار بصوتي، واشتغلت مع أبلة فضيلة وكنت بقبض في الحلقة 3 جنيهات وممكن أعمل 3 حلقات".
وأضاف أحمد عزمي:" أول عمل درامي شخصية الظاهر بيبرس وهو صغير، وكنت في معهد فنون مسرحية دفعة أحمد رزق ونضال الشافعي ومحمود عبد المغني، وبعتز جدًا بفيلم الأبواب المغلقة، وبحب فيلم قبلات مسروقة، والحقيقة اللى صعدني لدور البطولة في الفيلم ممدوح الليثى الله يرحمه وكان مؤمن بموهبتي".
واختتم أحمد عزمي: "اضطريت أعمل أفلام مقاولات علشان أقدر أصرف على بيتي، ومن الأعمال اللي بحبها عباس الأبيض، ويتربى في عزو مع يحيى الفخراني".
