التصريحات الكاملة لـ منى هلا: زوجي أعلن إسلامه بعد زواجنا.. وعندنا قناعة إننا منخلفش

كشفت الفنانة منى هلا عن تفاصيل حياتها الشخصية وزواجها من شخص لا يحمل الجنسية المصرية، كما أنه أعلن إسلامه بعد زواجهما ولا يمانع قرارها بعدم الإنجاب.

تصريحات منى هلا 

وقالت منى هلا خلال تصريحات تليفزيونية: "زوجي مش مصري وأعلن إسلامه بعد زواجنا، وعندنا قناعة إننا منخلفش، شوفي اللي بيحصل حوالينا أجيب ولاد يشوفوا إيه حروب مجاعات كوارث طبيعية؟ طيب ليه؟ والناس اللي بتقول بنخلف علشان حد يقعد جنبنا وإحنا كبار في السن أنا جدتي عندها 7 عيال و10 أحفاد وفي الآخر ماتت لوحدها في المستشفى، مش علشان احنا كنا قساة القلب ولا حاجة".

وتابعت منى هلا:" أنا مش من أولوياتي إن يكون عندي أطفال ولو بقى عندي الرغبة ممكن أتبنى أو أكفل طفل، فيه أطفال كتير جدًا معندهمش أمهات".

وأضافت منى هلا:" عائلتي لم تمانع زواجي من شخص لا يحمل الجنسية المصرية، والدي ألماني، وعيلتنا فيها جنسيات متعددة ومفيش مشكلة إن جوزي ميكونش مصري.. أنا معرفش الندم وبشوف إن الغلطات فرصة للتعلم مش للندم، وبؤمن إن فيه ناس عندها طاقة وحشة لأنها حصلتلي كذا مرة".

بكاء منى هلا 

دخلت منى هلا في نوبة من البكاء أثناء حديثها عن التمثيل، وقالت منى هلا إنها تعشق مهنة الفن من قلبها، موضحة:" أنا بحب التمثيل من قلبي وكل الناس اللي درست ليهم طول الوقت بحاول أوصل ليهم فكرة أن التمثيل مش كلام بنطلع نحفظه ونقوله لا هو طاقة من صحتك ووقتك وروحك".

وأضافت منى هلا:" أنا بحب التمثيل للدرجة اللي تخليني أعيط ولا أخجل من مشاعري أمام الجمهور، والممثلين بيبقوا واقفين على المسرح كأنهم بيعروا روحهم قدام المتفرجين بنغني ونمتعهم ونسليهم ونمثل عشانهم وكمان بنظهر قدامهم الضعف الإنساني.. ووقفتي على المسرح بتديني رضا عن نفسي".

وقالت منى هلا: "أختي لبست النقاب وهي حرة في قرارها، ولكني استغربت لأنها قبلها بدأت تمثل ولكن أنا معنديش مشكلة دي حريتها الشخصية، وهي مش بتضايق من جرأتي ومينفعش أي حاجة تكسر علاقة الإخوة بينا".

منى هلا عن سعاد حسني 

كما تحدثت منى هلا عن ضرورة عدم الحكم الأخلاقي للممثل على الأدوار التي يقدمها، قائلة:" القراءة والثقافة والتعلم بيخليكي فاهمة النفس البشرية كويس جدًا وبتدي لكل واحد مبرراته لأن مبيكونش عندنا حكم أخلاقي على اللي حوالينا".

وتابعت منى هلا:" في التمثيل مبيكونش عندنا حكم أخلاقي على الشخصية اللي بنقدمها، والوحيدة الله يرحمها سعاد حسني هي أعظم ممثلة خلقت على وجه الأرض مكنش عندها حكم أخلاقي على أي شخصية بتلعبها، ولذلك مفيش منها في العالم كله".

وأضافت: "فكرة التعلم والمعرفة بيخلينا طول الوقت عندنا مبررات للبني آدمين، لأننا بنشوفهم من وجهة نظر إنسانية مش قانونية ولا أخلاقية".

وعلقت منى هلا على تصريحها السابق، بأن البشر يستحقون فيروس كورونا، موضحة: "مش فاكرة إني قولت كده ولكن إحنا كبشر دمرنا الكوكب وسبب خراب حاجات كتير جدًا، في حيوانات انقرضت بسبب البشر، والتلوث والعوادم، كده كده الطبيعة هتقلب علينا قريب أو بعيد ونشوف اللي بيحصل من كوارث طبيعية دلوقتي زي الحرائق بدون سبب والفيروسات بدون أسباب".