لبنى ونس: الوسط الفني اتغير180 درجة.. وكنت خايفه من محمد رمضان

حلت الفنانة لبنى ونس ضيفة على الإعلامية شافكي المنيري في برنامجها “التاسعة”، وتحدثت عن حياتها الشخصية والفنية، وكواليس تصوير مسلسل جعفر العمدة، الذي عرض في الموسم الرمضاني 2023 والذي حققت خلاله نجاحا كبيرا.

تصريحات لبني ونس 

قالت لبنى ونس:" لما رجعت لـ الفن وجدت تغيير في الوسط الفني 180 درجة، وهنا كانت الصدمة هواكب إيه ولا إيه أنا اتربيت في الأبيض والأسود".

وأضافت لبنى:"كواليس جعفر العمدة كانت عاملة زي الكتيبة والخلية، وكل واحد كان عارف هو بيعمل إيه وده اللي خلق جزء كبير من نجاح العمل، وكان في رب للعمل اللي هو المخرج محمد سامي ومفيش حد فوق حد ومفيش حاجة اسمها نجم وأقل منه".

وتابعت:" أنا كان في أحاسيس مضطربة جدًا بيني وبين محمد رمضان كنت عايزاه يختفي لأني خايفة منه طول مسلسل جعفر العمدة، وكانت مشاعر قلق طول الوقت من بعد ما أسلم عليه كنت باخد مشاعر الشخصية".

لبنى ونس عن مسلسل جعفر العمدة 

واستطردت:"كان في كيمياء بيني وبين أحمد داش ومكنش عندي شك أي لحظة أنه مش ابني، وهو كان عنده نفس الإحساس وكنا في الحالة ومش عايزين نخرج منها".

وتابعت:" محمد سامي هو اللي مرشحني وقالي إن الدور ده عصب الرواية وده الأساس، والشخصية مش بس أم خايفة تفقد ابنها اللي ربته هي من البداية زي أي سيدة في المجتمع اتطلقت مرتين علشان مبتخلفش، يعني عندها حالة نفسية سيئة جدًا.. وفاجئني زي الجمهور أنه بدل ما يعمل ميك آب أو يجبلي دوبلير جاب برنامج بيستخدموه في هوليوود يصغرني، برافو عليه أنا اتفاجئت".

وأضافت:" مشاعر الأم على الشاشة مش سهلة خالص والشخصية الناس تعاطفت معاها علشان صدقوها وحبها للولد وتمسكها بيه، وفي نفس الوقت كنت بذاكر ملاحظات محمد سامي أن الشخصية طيبة جدًا.. التمثيل مهنة وموهبة من ربنا، وفكرة أن الفنان والنجم بحسها للتريند زي ما بيقولوا، وفي كتير جدًا من النجوم مع احترامي ليهم مش ممثلين".

وعن سبب ابتعادها فترة عن الوسط قالت: "حسيت إني مش هعرف أوفق بين البيت والأولاد والفن، واختارت إني أرجع تاني الفن لما أولادي يكبروا، وبعد ما كبروا رجعت".