حمو بيكا لطلاب الثانوية: العلم بيستر صاحبه.. لو رجع بيا الزمن كنت أكلت الكتب
حرص مطرب المهرجانات الشهير حمو بيكا، على تقديم نصيحة إلى طلاب الثانوية العامة، بالتزامن مع بدء الامتحانات غدًا، موضحاً ندمه بسبب عدم دراسته.
نصائح حمو بيكا لطلاب الثانوية
وكتب حمو بيكا عبر حسابه بموقع تبادل الصور والفيديوهات الشهير انستجرام: "بكره تعتبر بداية الامتحانات النهائية للثانوية العامة، وأنا مش جاي أديك موعظة ولا جاي أعمل شيخ عليكم..بس أنا جاي أقول لك إنك قد أي حاجة في الدنيا، وتعرف تعمل أي حاجة طالما عندك إصرار وحلم هتوصل يعني هتوصل".
وأضاف حمو بيكا:" الثانوية العامة مش نهاية الرحلة والمطاف ليكم، وإنما هي بداية الحلم الحقيقي اللي نفسك تحققه، اتعلموا العلم حلو أوي، العلم بيستر صاحبه، أنا لو رجع بيا الزمن كنت اتعلمت وأكلت الكتب اكل.. ربنا معاكم يا رب وتحققوا كل أحلامكم".
مؤهل حمو بيكا التعليمي
وكان بيكا قد نصح العام الماضي طلاب الثانوية، إذ كتب:" هو أنا أه مش متعلم وأخدت (محو الأمية) بالعافية، لكن ده مش حاجة تفرح ولا تقول (عندك بيكا أهو مش متعلم بس ناجح)، صدقوني والله طعم النجاح مع العلم مختلف تماما عن طعم النجاح من غير علم، مردفًا: العلم بيفرق في كل حاجه في الدنيا، كمية معاناة بشوفها يوميًا بسبب اني مش متعلم كبيرة اوي مش بتمني حد منكم يشوفها أو يتعرض لها، العلم بيستر كتير أوي وبيخليك واعي ومتفتح في كل مجالات الحياة".
واستكمل بيكا: "هو أه الشارع علمني كتير، بس مش زي المدارس والجامعات، حتى لو مش هشتغل بشهادتك، وحتى لو دخلت كلية مش بتحبها، بس يكفي إنك متعلم ومعاك شهادة تقدر تسد بيها عين الشمس، اتعلموا وخلوا بالكم من تعليمكم وشهاداتكم لأنها هتفرق كتير أوي معاكوا ومع عيالكم بعد كده، أنا آه مادخلتش مدارس ومتعلمتش، بس حابب كل اللي حواليا ناجح ومتعلم وأوعى يوم تقول أهو فلان ناجح بس مش متعلم".
