غادة إبراهيم: بعمل خير علشان أمحي السيئات.. والناس بتشكك في ميول أحمد سعد

كشفت الفنانة غادة إبراهيم، عن الكثير من أسرار حياتها الشخصية والفنية، وردت على تساؤلات ملابسها الجريئة مع حديثها عن الدين، مشيرة إلى أنها تفعل خيرًا كثيرًا كي يمحو الله سيئاتها.

تصريحات غادة إبراهيم 

وقالت غادة إبراهيم خلال لقاء تلفزيوني:" أنا لسه راجعة من العمرة من شهر ومن العمرة للعمرة يمحو الله ما بينها من ذنوب، وفي فرق بين الموبقات والكبائر وأنا لا أقرب الكبائر، وبحب ألبس لبس فاشون وبعمل خير كتير يمحي لي السيئات وبقرأ كتير في الدين وبصلي متواصل ومش بسيب فرض بقى لي أكتر من عشرين سنة، وفي الآخر الحاجات دي تعتبر من الموبقات مش الكبائر لأني مش بعمل سحر ولا قذف المحصنات ولا أكل مال اليتيم والربا وربنا يسامحني".

وأضافت: "لكل مقام مقال ولما أدخل مكان مجمع بلبس محتشم، ومقدرش أقول الحجاب مش فرض، وربنا يهديني ويسامحني وممكن الفترة الجاية أقرب أكتر من ربنا".

غادة إبراهيم عن مشهدها الجريء في الإمبراطورة 

وتابعت غادة:" لو أقدر أشيل مشهدي كنت هشيله وهو المشهد الوحيد اللي عملته في تاريخي، والمشهد ده ما كانش مكتوب كده على الورق، وبعدها عملت 15 فيلم مفيهمش ولا حاجة، وهما في الأول كانوا عاوزين يحطوني في أدوار الإغراء وشبهوني بناهد شريف وكانوا عاوزيني آخد مسيرتها وأكون خليفة ليها ولكن رفضت أقدم إغراء تاني".

وأكدت غادة إبراهيم انها انفصلت بعد مشهدها في الفيلم قائلة:" كان فيه خلافات بيني وبين جوزي ومتفقين على الانفصال والمشهد ده عجل بالانفصال، وبعد ما شافه قال لي مش كنت عاوزة تنفصلي هطلقك، وكنت مخبية الفيلم لكن أولاد الحلال قالوا ليه تعالى شوف".

غادة إبراهيم عن الرجل بالنسبة لها 

وقالت غادة إبراهيم: "الراجل بالنسبة لي وسيلة وشكل اجتماعي وسفر وصرف وفلوس وبيت واحتياج، ومن ناحية أخرى عواطف وحب ومشاعر وسند وضهر واحتواء".

وأضافت غادة إبراهيم:" أنا محتاجة الرجل في حياتي ولكن الرجالة الحقيقيين يتعدوا على الصوابع، والحلوين متكوّش عليهم، وأنا منتظرة الراجل ولكني لا أبحث عنه، مضيفة مازحة: بقول له بص وشوف كويس وملي نظرك شكلًا وموضوعًا".

وأردفت غادة إبراهيم:" أنا طيبة وحنينة ورومانسية جدا وبتاعة حركات الورد والعود والبرفان، وبحب الراجل يعمل لي كده ويجيب لي هدايا وورد، والرومانسية كل سنة بتزيد عندي وبكون في احتياج للرومانسية والعطاء".

غادة إبراهيم عن ملابس أحمد سعد في السعودية 

تحدثت غادة إبراهيم عن ملابس المطرب أحمد سعد في حفله بالسعودية قبل أسابيع، قائلة:" مش هينقص من رجولته بس هيتفهم غلط، خاصة أن أحمد راجل أوي وصعيدي، واتصدمت لما لقيته لابس كدة، وبكده ممكن الناس تشكك في ميوله، برغم إنه طول عمره بيغني تواشيح دينية، ونفسي أجيب اللي الستايلست اللي لبسه وأقوله منك لله دمرت الراجل".

إطلالة أحمد سعد بحفل جدة

وتابعت: "ده كدة لبس مش سوي، وممكن يشككوا في ميوله بسبب اللبس، وشوفت ناس مركبة جيبة على اللي هو لابسه، برغم إنه طول عمره بيغني تواشيح دينية، ونفسي أجيب الستايلست اللي لبّسه وأقوله منك لله دمرت الراجل".

وأضافت:" مقبلش طبعا إن راجلي يلبس اللبس ده، أو يلبس حلق زي أحمد سعد، لو هو لبس كدة أومال أنا ألبس إيه؟ كدة يبقى أطلع على المسرح بـ البيبي دول بقى، ومع ذلك أنا من عشاق أحمد سعد، بس معرفش ليه لبس كده".