عائشة بن أحمد: الحياة جميلة بدون خلفة.. والرقص بيريحني

كشفت الفنانة عائشة بن أحمد، عن سبب عدم زواجها حتي الاَن، قائلة: "تكوين أسرة محتاج مجهود وأنا خايفة من المجهود ده ومش عايزة أمرض ولا أتعب ولا اتوجع وده اللي خلاني لغاية دلوقتي متجوزتش".

تصريحات عائشة بن أحمد 

وأضافت خلال لقائها ببرنامج “كلمة أخيرة” الذي تقدمه الإعلامية لميس الحديدي بقناة “أون إي”: "أنا لما بحب بتوجع فأنا مش عايزة اتوجع ومش عارفة ليه بتقلب معايا وجع وبيبقى الموضوع مش بسيط معايا، وانا مستنية كتير أوي من الشخص علشان افكر ارتبط به".

شروط زوج عائشة بن أحمد

وتابعت عائشة بن أحمد:"حاسة اني عايزة أجل قرار الزواج إلا لو لقيت شخص أحبه أوي ومفيش شروط معينة أهم حاجة يبقى فاهم شغلي ورجل واعي ومثقف مينفعش اقعد معاه ونتفرج معاه على فيلم تعبت فيه وهو مش فاهمه، لازم يبقى عنده عمق ومش موضوع غني وأنا مش مادية انا عايزاه يبقى زيي علشان بعدين ممكن يبقى فيه مشاكل نفسية من ناحيته لو انا اغنى منه وانا مش عايزة المشاكل دي، وحد كمان يقبل الشهرة".

وأكدت عائشة أنها تكره الكذب، قائلة: "أنا بكره الكذب حتى الصحاب العاديين لما بيكدبوا بينزلوا من نظري ومفيش حاجة اسمها كذبة بيضا، الرجل الكذاب بيخون".

مسلسل وعد إبليس 

قالت الفنانة التونسية عائشة بن أحمد: أصبت بحالة رعب وخوف خلال مشاهدة الحلقة الثالثة من مسلسل "وعد إبليس.. الطرح الدرامي والتمثيلي في مسلسل "وعد إبليس" مختلف والمشاهد تم تصويرها بطريقة عصرية للغاية، وخرجت منه بنتيجة وحقيقة مهمة وهي اننا طول الوقت في صراع مع الشيطان.

وأوضحت عائشة بن أحمد باكية: "شخصية أمينة وتركيبتها جديدة على المشاهد العربي وجريئة، وفي نفس الوقت إيه الجرأة دي وليه بتعمل كده وفي النهاية كانوا متعاطفين معاها ولما مشيت رحلت زي النسمة وتركيبة جديدة وشخصية سيد رجب ومحمد ممدوح ومنى زكي جديدة ومكتوبة بحرفية".

وأضافت: "سيد رجب بيجي التصوير زي النسمة ولما بيتكلم بيعطي طاقة حلوة وبيريح والشغل معاه ممتع ومتواضع ـوي وبحس إنه مش عارف حجمه وعامل زي الطفل بس أنا شايفاه حاجة كبيرة وهو بيتعامل إنه طفل صغير جاي يلعب ويحب ويتحب".

 مسلسل لعبة نيوتن

وتابعت: "للأسف ما كانش معايا إلا مشهد واحد مع منى زكي في مسلسل لعبة نيوتن، واتعرفنا على بعض أكتر بعد لما خلص المسلسل وما عرفتش أستمتع بنجاح لعبة نيوتن أوي علشان كنت في تونس وما كنتش فاهمة النجاح الكبير للعمل، محمد فراج قال لي احنا مكسرين الدنيا وهو اللي خلاني أفهم إن المسلسل جامد أوي".

واستطردت:"مسلسل لعبة نيوتن، فتح لي أبواب البطولة، فيه ناس ما كانتش شايفة فيَّ إني ممثلة وبعدين عرفوا وفهموا إني فعلًا ممثلة أنا مش عايزة يتقال عليَّ وجه جميل وإلا أروح أشتغل موديل، لكن أنا ببذل مجهود كبير علشان ما يقولوش عليَّ وجه جميل وأفرح لما الناس تشوف إني بمثل علشان موهوبة وعندي القدرة".

وعادت عائشة بن أحمد لتبكي من جديد، بسبب تذكر وفاة والدها، قائلة: "حسيت إن ضهري اتكسر وانقسم فعلًا بس هو في مكان أحلى بكتير من اللي احنا فيه، الله يرحمه، وبعد وفاته جبت ماما تعيش معايا في مصر".

عائشة بن أحمد ورأيها في الإنجاب 

وعن فكرة الإنجاب قالت عائشة بن أحمد: "ممكن الواحدة تفضل جميلة وحلوة بدون خلفة وأمي تفهمت فكرة إني مش عايزة أتجوز ودلوقتِ كمان فيه تجميد البويضات ونفسي أبقى مبسوطة في حياتي، وأنا دايما بعرف أحمي نفسي علشان دايمًا بخاف من الغلط".

وأضافت الفنانة عائشة بن أحمد: “أنا قربت من ربنا أكتر لما بدأت أغوص تحت المياه، وأنا أصلًا ما كنتش باكل إلا سمك وبعدين لما بدأت أغوص قلت والله مش هاكل سمك تاني، السمك حيوان مختلف أقتله ليه علشان أبسط نفسي”.

وتابعت "في الأول بطلت آكل لحم الخرفان لما شُفته بيتدبح قدامي وبطلت آكل فراخ، باكل فاكهة وخضار كتير وبقت أميل للنباتية، وبحرص على إني آخد بالي من الوزن من خلال الرياضة وبحب الرقص كتير وبحب أروح الجيم علشان أرقص، أنا طولي 174 سم، أنا طويلة وجسمي حلو".

واستكملت: "الرقص بيريحني فوق ما أي حد يتخيل ولما أرجع من مكان وأنا راقصة ببقى طايرة وبحب كل أنواع الرقص".

ولفتت: "برقص من وأنا صغيرة ولما رُحت واتفرجت على فرقة سهام بالخوجة حصل لي حالة انبهار ورجعت قلت لماما أنا عايزة أتعلم الرقص وأروح الفرقة فوافقت وبابا وافق، لكن فيه سنة في الثانوي سقطت بابا قال لي سقطتِ مفيش رقص تاني عايزة ترجعي للرقص تاني لازم تجيبي مجموع كبير علشان ترجعي تاني وعملت كل شيء علشان أرجع أرقص تاني وكان عندي وقتها 15 أو 16 سنة".