دياب: منى زكي كملت تصوير رغم إن أيديها اتكسرت.. ومراتي مظلومة معايا خايف اقتلها

كشف الفنان دياب عن سعادته بنجاح شخصية صالح، التي قدمها في مسلسل تحت الوصاية بطولة الفنانة منى زكي والذي عرض خلال موسم رمضان 2023.

تصريحات دياب 

وقال دياب خلال لقائه مع الإعلامية إسعاد يونس في برنامج صاحبة السعادة:" أبشع كواليس تصوير مسلسل تحت الوصاية أن منى زكي وهي بتصور مشهد حرق المركب أيديها اتكسرت، وكملت تصوير بالرغم من أنها وقعت واحنا بنعمل البروفات للمشهد، واتحملت وأيديها ورمت وخدت مسكن وكملت وشوفت رجالة مبتعملش كدا".

وأكد دياب أنه لا يحب البحر، موضحًا: "أنا كائن مش بحري أصلا، والجو ده جديد عليا وبحمد ربنا أن مكنش ليا مشاهد كتير في البحر.. مكنش مطلوب مني أوي أني أعرف حاجة عن البحر، لأن الدراما في الشخصية اللي بقدمها في الصراع بين صالح وحنان، بس أول ما وقفت على الرصيف في المينا بعزبة البرج حسيت أني بقيت واحد من الناس دي".

معاناة زوجة دياب 

وكشف دياب، عن معاناة زوجته هاجر الإبياري منه بسبب "نفضة النوم" أو ما يسمي بمشكلة "الرفس" موضحاً: "أنا برفس وأنا نايم ومراتي مظلومة معايا ظلم مش طبيعي وأنا ما ينفعش أنام في السرير محتاج أنام في الإستاد".

وأضاف: "أكتر إصابة اديتها لمراتي هاجر الإبياري بسبب مشكلة الرفس، كانت الكوع، أنا ببقى نايم مش عارف بعمل إيه وألاقيها منهارة وهي مغمى عليها وبتعيط من الصبح للظهر وما ببقاش عارفة أنا بعمل إيه بس دي مشكلتي".

وأوضح دياب: "أنا فيه حاجات بتعصبني في بعض المواقف وأنا صاحي وبكتمها جوايا علشان ما أزعلش حد وبيصعب عليَّ أضايق حد ولو دقيقة وعلشان كدا بطلع العصبية دي بالرفس خلال النوم".

وتابع مازحًا: "أنا خايف أقتل مراتي قتل خطأ وأنا نايم بسبب الرفس، ومحتاج عالم يفسر لي المشكلة دي، أنا ساعات بضرب وأشتم وأنا نايم وهي بتفضل تسألني مين الناس اللي كنت بتشتمهم دول أقول لها دول أصحاب المواقف اللى عصبتني".

وأكد دياب أن صالح شخصية رمادية، ولا يحترف الشر بشكل واضح، ولكنه يحاول توفير مصدر دخل ليتزوج حبيبته، موضحًا: "صالح مش ماهر في صنعة أبوه فا مش هتدخل له الدخل اللي يخليه يتجوز البنت اللي بيحبها.. وعنده نرجسية وذكورية اللي موجودة عند أغلب الشريحة دي من الناس والمركب دي حلم حياته".

وأشاد دياب بـ منى زكي قائلًا: "أنا بقالي 9 سنين بمثل.. ما شفتش في حياتي أصدق من مني زكي ولا حد محترف زيها ولا في تعاملها مع زمايلها واحترامها لمهنتها.. ربنا يحميها ويحفظها ويخليها لنا".

وقال عن أبطال المسلسل: "علي الطيب فنان وموهبة عظيمة وربنا يحميه ويستحق أكتر من كدا بكتير.. ونهى عابدين صادقة جدًّا ومحترفة وكل الناس عاملة شغل عظيم وده يبين إنه المخرج شاطر أوي".

وأشاد دياب بالمخرج محمد شاكر خضير، موضحا:" طلع أصدق مافي المواهب دي كلها وأجمل ما فيهم.. هو مسبش حد.. ومطلعنا كلنا شكلنا حقيقيين".

وكشف دياب عن أعماله في الفترة القادمة، قائلًا: "منتظر عرض فيلم السرب بعد تأجيله عدة مرات وهو عمل يشرف.. ولسه مش لاقي حاجة محترمة أرجع بيها للغناء"