أمير كرارة: محمد رمضان نجم كبير كسر الدنيا بـ "جعفر العمدة"

حل الفنان أمير كرارة، ضيفا على برنامج الراديو بيضحك 90 90، وتحدث عن مسلسله سوق الكانتو الذي عرض في الموسم الرمضاني الماضي 2023، وكذلك رأيه في المسلسلات الأخرى التي شاركت في رمضان.

تصريحات أمير كرارة 

وأكد كرارة أن مسلسل سوف الكانتو مأخوذ عن المسلسل البريطاني بيكي بلايندرز، بعد الانتقادات التي تعرض لها صناع الفيلم، قائلا:" أول ما نزل البوستر أتقال بيقلدوا بيكي بلايندرز، اه إحنا بنقلده، أنا صريح جدا على فكرة، أنا كنت قاعد على الكرسي وحسين المنباوي جمبي وكان المسلسل شغال قلت له هموت واعمله".

وأضاف:" ويا عم اه بنقلده إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن ده، وعملنا حدوتة تانية خالص، وأنا حبيت أغير الشكل بشكل المسلسل بالحدوتة والزمن، فتلاقي اللبس والشوارع والديكور مختلف، وقلت لـ هاني سرحان نفسي أعمل حاجة شبه بيكي بلايندر".

وتابع أمير كرارة:" زي فيلم البعبع، اتقال بيقلدوا فان ديزل.. اشمعنى بره بقى له عشرين سنة بيطلع بالجينز والفلنة البيضة وهناك مكسر الدنيا".

واستطرد أمير كرارة: "مشوا الدنيا وما تحبكوهاش واتبسطوا إحنا بنعمل حاجة لطيفة، ما هم بره بيقلدوا برضه، وفيلم مان فاير كسر العالم  مع أنه هو هو الفيلم اللي عمله أميتاب باتشان من عشر سنين، أصل الحب واحد والكره واحد والأكشن واحد والكوميديا واحدة، هي تيمة وبنعملها بشكل مختلف، ما إحنا شوفنا مسلسلات كتير لواحد ومراته حبوا بعض واتطلقوا".

أمير كرارة و المسلسلات التركي 

هاجم أمير كرارة المسلسلات التركي، قائلا: "ما أنتم بتتفرجوا على تسعين حلقة في المسلسلات التركي والأحداث واحدة، ومش عارف بتتفرجوا على أيه ومبسوطين ليه، ومفيش أحداث وحاجة ملل وزعيق وصويت، وصعبة أوي، يعني أقعد مع مراتي ألاقي المسلسل فيه واحدة بتعيط علشان شافت حبيبها في الكشك معاه واحدة بعد 8 حلقات ألاقي البنت خارجة من الكشك، بس هي عقدة الخواجة تقريبًا"

أمير كرارة عن مسلسل جعفر العمدة

وتابع أمير كرارة:"الجمهور عاوز قصص وحواديت تتناسب مع طبيعة الشهر الكريم ومن أهم المسلسلات التى عرضت وكسرت الدنيا مسلسل جعفر العمدة لمحمد رمضان والمخرج محمد سامي.. محمد رمضان نجم كبير وتعاونه مع المخرج محمد سامي يؤدي إلى خروج عمل مميز كما حدث فى جعفر العمدة".

أمير كرارة عن البعبع

قال الفنان أمير كرارة:"وافقت على فيلم البعبع من أول لما اتعرض عليا، وبعدين انشغلت في المسلسلات وفوجئت بالعمل يروح لحد تاني، ولكني اصريت إني أنا اللي أعمله وقلت للمؤلف أحمد بليبل اتصرف فقال لي انا كمان عايزك انت اللى تعمله".

وتابع:"كلمت المخرج حسين المنباوي وقلت له هبعتلك فيلم وأتمنى يعجبك وبعدها بـ6 ساعات كلمني وقال لي متسيبهوش ومفيهوش غلطة والفيلم جاهز ندخله من بكرة، وأنا وثقت في فيلم البعبع من أول يوم".

واختتم كرارة:"أول مرة اشتغل مع ياسمين صبري ولقيتها بني اَدمة جميلة ومحترمة ودمها خفيف في فيلم البعبع واستغربت نفسها في العمل".