بوسي: إضربت واتهانت علشان أنزل الشغل في الهرم.. ومش هقبل أغني مع شاكوش أو بيكا
تحدثت المطربة بوسي عن موقفها من اعتزال الفن، وإمكانية تقديم عمل غنائي مع مطربي المهرجانات مثل حمو بيكا، حسن شاكوش،
تصريحات بوسي عن الاعتزال
وقالت بوسي عن فكرة الإعتزال: "في أوقات بتيجي على الواحد من كتر الحرب في الشغل والصعوبات في الحياة عموما والمهنة خصوصا ببقى عايزة تسيبها مخضرة، بس برجع أفكر وأشوف قد أيه تعبت وطلع عيني لغاية ما وصلت للي فيه، وشقيت واستحملت حاجات كتير للوصول للنجومية".
وتابعت بوسي، أن هناك خطوات فنية كثيرة لم تنفذها حتى الآن، واوضحت أنها تتمنى الوفاة برضا الله:" في حاجات كتير لسه معملتهاش في الفن وبطلب من ربنا دائما ياخدني وهو راضي عني".
وأضافت بوسي:" اتعودت أبقى قوية من صغري، بس ممكن يكون بسبب أني ملقتش ليا ضهر أتحامى فيه من صغري ويجيب لي حقي، فبقيت مقوية نفسي بنفسي، وأمي كانت كل حاجة بس في الأول والآخر هي ست، لكن عمري ما ظلمت حد بل ظلمت نفسي في حاجات كتير".
رأي بوسي في مشاركة بيكا وشاكوش
وأكدت المطربة بوسي، أنها لا توافق على المشاركة في دويتو مع مطربي المهرجانات حسن شاكوش أو حمو بيكا، موضحة: "لو شاكوش أو بيكا عرضوا عليا أعمل دويتو مش هقبل ومش عايزة أعمل النوعية دي من الأغاني، وهما شغالين بطريقة أنا مش بغنيها".
وأوضحت بوسي: "حمو بيكا وحسن شاكوش بيغنوا مهرجانات غير الغناء، واللون اللي بغنيه هو الأغاني الشعبية، مشيرة إلى أنها تعتمد على نفسها منذ صغرها لعدم وجود سند لها في حياتها".
ووجهت رسالة لشيرين عبد الوهاب، قائلة: "مضايقتش لما شيرين غنت أغنيتي لأن نجمة كبيرة زيها تغني أغنيتي في بدايتي كانت حاجة كويسة، وأنصحها تفوق وترجع لشيرين بتاعة زمان اللي كلنا عارفينها ودي نصيحة لأني بحبها".
مشاركة بوسي في شارع الهرم
كشفت بوسي، كواليس تصوير فيلم شارع الهرم، موضحة أنها ندمت على العمل في شارع الهرم قائلة: "مقلتش شغلي في شارع الهرم تنازل لكن ندمانة على الشغل في شارع الهرم لكن هو علمني اتعامل مع الناس وخلاني عندي خبرة في التعامل".
وأقرت بوسي بأنها لم تكن تحب العمل في شارع الهرم لأن الأجواء لا تشبهها: "بصراحة مكنتش حابة أشتغل في الأماكن دي والأماكن دي مش شبهي وشفت فيها حاجات كتير ولكن كنت عيلة صغيرة وباكل عيش".
وتابعت:"كنت مش عايزة استمر وكنت مجبورة على الشغل وكنت شغالة بالإكراه واضربت عشان أنزل الشغل وتعرضت للإهانة، وبحمد ربنا إن ربنا لسه مخلي فيا عقل من اللي شوفته".
أكدت بوسي عدم منعها طليقها من رؤية ابنها قائلة:" مش مانعة طليقي يشوف ابنه بالقوة وهو مش بيشوفه عشان لم يسعَ لده وهو بيقول للناس أني مانعاه ولكن عمري ما أمنع ابني يشوف أبوه وابني مطلبش يشوف أبوه ولا أبوه طلب".
وأوضحت بوسي أن طليقها لا يصرف على ابنه، قائلة:" مش بيصرف عليه وأنا اللي متكفلة به من يوم ما اتولد حتى الآن".. وتابعت المرض النفسي زي أي مرض وكلنا جوانا حاجات محتاجة دكتور نفسي وأكيد نفسي أروح لدكتور نفسي ولكن الدكاترة قليل لما تلاقي حد تثق فيه لكن عمري ما رحت لطبيب نفسي".
