سليمان عيد: اتعزمت على فرح حبيبتي وغنيت ظلموه..وهذه حقيقة خلافي مع السقا

حل الفنان سليمان عيد ضيفا مع الإعلامية ياسمين عز، في برنامجها كلام الناس، وتحدث عن ذكريات طفولته، موضحاً أن عائلته وأصدقاءه كانوا يطلقون عليه لقب العندليب لحبه الكبير لـ عبد الحليم حافظ.

تصريحات سليمان عيد عن طفولته 

وقال سليمان عيد: "وأنا صغير كانوا مسميني العندليب لأني كنت بحب عبد الحليم حافظ جدًا وكنت رومانسي، ولما كنت بحب بنت الجيران زي أي واحد في أي منطقة شعبية أهلي كانوا بيقولوا لي أنت لسه صغير فكنت أسمع ظلموه وأعيط، ومعظم زملائي الكوميديانات عندهم الحتة دي، والواحد بيتغلب عليها بأنه يعمل كوميدي لأن الرومانسية بتخلي الواحد ضعيف ورقيق".

وأضاف سليمان عيد متحدثاً عن حب الطفولة قائلًا: "كنت في إعدادي وحببت من طرف واحد وكنت بتكسف أقول، ومرة بعت لها كلمة بحبك ورميت الورقة وبعد فترة أهلي قالوا لي أنت صغير، وبعد فترة هي بعدت وأنا بعدت ونسيت، فلقيت صديق ليا في الثانوية وعرفت أنها أخته فاحترمت أني ما أتكلمتش غير لما أخلص مذاكرة وجامعة علشان أكون جدير بها ولكنها كانت اتجوزت في نص المرحلة واتعزمت على فرحها وقعدت أغني ظلموه".

سليمان عيد والصلع

وتابع سليمان عيد: "جبتي حق الرجل الأصلع واديتي له وضعه، وعمر ما الراجل كان بشكله أو شعره الراجل بشخصيته، وأنا بحب أكون صريح في علاقتي مع زوجتي وولادي وحتة الصلع باستغلها في شغلي لأني دايما بحكي الأفيهات اللي حصلت على شعري بسبب أول واحدة حبيتها في الجامعة، كنت وقتها بدأت أقرع وكنت بجيب شعري قدام علشان محدش ياخد باله وكان الناس بيقولوا لي الحق أعمل بروكة كأنها مصيبة، ولما عرفت واحدة وبدأنا نستلطف بعض ولسه هقول لها بحبك، الهوا طير الشعر واتخضت وقالت يا حرام إيه ده أنت أقرع ومشيت وسابتني على أني مريض".

وأردف سليمان عيد:" لو واحد قليل الأدب هينفعك بإيه شعره، لا مؤاخذة تفاهة، والزمن نصفنا والشعر اللي ع الزيرو طلع موضة".

وكشف سليمان عيد، أنه كان يفكر في زراعة شعره منذ فترة كبيرة قائلًا: "زمان كانت القرعة كلها ظهرت فواحد بيقول لي الشعرة بـ 600 دولار فلو حسبتها هجيب الثروة دي منين".

سليمان عيد عن مسلسل البيت بيتي

وقال سليمان عيد:" الجزء الثاني من مسلسل البيت بيتي، انتهينا من الجزء الأول من العمل منذ سنة، وطوال هذة السنة نحضر في العشر حلقات من الجزء الثاني، وأخذ وقته بشكل كبير، ويتواجد بهم العديد من المفاجآت، وأعتبر من أبطال العمل في هذا الجزء، بالجزء الأول كنت أصم في أول حلقتين فقط وتحدثت في باقي الحلقات، أما في الجزء الثاني أتحدث في الـ 10 حلقات".

وأضاف سليمان عيد:" الأستاذ خالد مرعي هادئ بشكل كبير في موقع التصوير، وهذا الهدوء مفيد للفن، ولا توجد عصبية، وكل العوامل ربنا أكرمنا في التميز لإن العمل رعب كوميدي".

حقيقة خلاف سليمان عيد وأحمد السقا

كشف الفنان سليمان عيد حقيقة وجود خلاف بينه وبين الفنان أحمد السقا، قائلا: "مفيش خلاف بيني وبين أحمد السقا والكلام ده مش حقيقي، وهو كان بيعمل سيدتي الجميلة وكان معاه علاء مرسي وعلاء كان عنده ظروف وارتبط بحاجات تانية فكلمني أيمن بهجت قمر وطلبني أقدم الدور لإن علاء سابه ووافقت، ولكن لما ظروف علاء اتحسنت رجعته للدور وسبته".

وأضاف سليمان عيد: "أنا مش بحب أكلم حد كتير بدون سبب ومش بحب لما أكلم حد ما يردش عليا، ويمكن زمان مردش عليا مرة ومفيش حاجة بيني وبينه وهو استقبلي حلو جدا في المسرحية ورجعت علاء للدور لما ظروفه اتحسنت".

وتابع سليمان عيد:" مش بحب أكون مزعج لصحابي وفي العيد بكلمهم وفيهم اللي بيرد وفيهم اللي مش بيرد واللي مش بيرد مش بزعل منه واللي بيرد بعزه جدا وبكون فرحان ومش بكون عاوز حاجة من حد خاصة لو كنت قاعد في البيت مش بشتغل، وأنا  صاحب نجوم من أيام عادل إمام لحد أصغر الأجيال وعمري عمري ما قلت لزميل عاوز أشتغل".

واستكمل: "أحمد عشرة عمر وذكرياتنا مش بتتنسي والحياة مشاغل وحياتنا شغل ومن فترة قريبة كنت عاوز أروح لدكتور العيون صاحبه وصاه عليا وصاحبي جدا".