مي كساب: مكنش في دماغي التمثيل

كشفت الفنانة مي كساب عن أسرار، بدايتها الفنية ودخولها عالم الغناء حيث بدأت مطربة بمشاركة المطرب مجد القاسم، ثم بعد نجاحها في ست كوم تامر وشوقية مع الفنان أحمد الفيشاوي تحولت إلى ممثلة.

تصريحات مي كساب 

وقالت مي كساب خلال تصريحات تليفزيونية:" حصلي حاجة غريبة مبتحصلش لحد، أنا تحولت من مطربة مثلت، لـ مثلة هتغني وده فجأة من عند ربنا، ولما بدأت الغناء مكنش في دماغي التمثيل أبدا، والتمثيل كان حاجة أبعد من خطتي وطموحي لنفسي".

وأوضحت مي كساب، أن دخولها عالم الغناء كان من خلال مشاركتها في ألبوم جديد لـ المطرب السوري مجد القاسم، وأوضحت أن المخرج ياسر سامي نصحها بـ غناء أغاني ليست رومانسية، وأن أول كليب لها كان “شيل ده من ده يرتاح ده عن ده” من تأليف أيمن بهجت قمر.

بداية مي الكساب في الغناء 

وأضافت:" مجد القاسم كان بيدور على صوت فيروزي في الألبوم بتاعه وأنا واحدة بتغني رومانسي، ومكنش في دماغي أني هقول شيل ده من ده يرتاح ده عن ده، والمخرج ياسر سامي قالي الألبوم ده مش هيأكلك عيش، أنتي لازم تشوفيلك حاجة شبهك لآنك مش البنت الكيوتة".

وتابعت:" كلمت أيمن بهجت قمر وقولته على كلام ياسر سامي ليا، أيمن قالي في أغنية لو كملت يا رب تبقى من رزقك، بعدها على طول كلمني وسمعني الأغنية، وعملنا أغنية شيل ده من ده يرتاح ده عن ده، وحققت النجاح الكبير ده والوطن العربي أتقلب عليا والناس قالت مين المطربة الجديدة دي".

دخول مي الكساب التمثيل 

وكشفت مي كساب، عن بداية دخولها لـ عالم التمثيل، مشيرة إلى أن والدها كان يرى أنها تستطيع الدخول في التمثيل، موضحة: و"الدي كان شايف أني ممثلة، واترشحت في دور مع عمرو سعد وحنان مطاوع وسهير المرشدي وماجد المصري ومسلسل مليان أساتذة كبار".

وتابعت: "جالي مكالمة من حد بيقولي أنا أحمد الفيشاوي قولتله مين، قالي أنا الممثل وعايزك تمثلي معايا في ست كوم إنتاج شريف عرفة وتعالي أعملي كاست".

وأضافت: "روحت وقتها كان أحمد مكي هو اللي هيخرج ست كوم وعملت كاستينج واتقبلت وبعدها نجح النجاح الكبير ده، ومن هنا جت إنطلاقتي في التمثيل ونسيت أني مطربة".

وتابعت مي كساب: "أحمد عز نجم كبير وموهوب وبيعامل زملائه بكل أحترام وبيحب شغله جدا واستفدت منه جدا.. ومسلسل اللعبة من المسلسلات اللي بتتعرض بره الموسم وبتنجح نجاح ساحق، ومعتز التوني من أكثر المخرجين في مصر اللي بحب الشغل معاه".

وأضافت:" قبل ما أشارك مع شيكو وهشام ماجد في مسلسل اللعبة، كنت من الفانز بتاعهم وكان نفسي أمثل معاهم من زمان، مضيفة: لما كنت بتفرج عليهم كان نفسي أدخلهم الشاشة وأمثل معاهم، وبحب مدرسة الكوميديا بتاعتهم جدًا".

وعن مشاركتها في مسلسل جعفر العمدة بطولة الفنان محمد رمضان، قالت:" شخصية ثريا جاتلي من محمد سامي وهو بيكتب كلمني وقالي أنا بكتب الشخصية مفيش حد في مصر يعملها غيرك، وأنا طبعا بالنسبالي محمد سامي مخرج مهم جدا وكان فارق معايا في تاريخي أني اشتغل معاه".