كنت بعيط.. خالد سليم يكشف معاناته من التنمر وعلاقته بتامر حسني

تحدث المطرب خالد سليم عن حقيقة خلافه مع الفنان تامر حسني بعدما أعتقد تامر أنه تنمر عليه في فيلم عمر وسلمي، ليبرر خالد سليم، قائلا: "أنا عمري ما أتنمر على أي حد بالعكس فيلم عمر وسلمى نجح وكان فيه شغل حلو معمول".

التنمر على خالد سليم

وأضاف: “أنا وتامر علاقتنا ببعض من بعيد لبعيد تمامًا احنا أصلًا مش صحاب لكن في البداية كنا صحاب هو كان بيبتدي وأنا كنت عامل “عالم تاني وأغاني السلم والتعبان” فعلاقتنا كانت لطيفة مع بعض لأننا نعتبر شريحة الجيل اللي بعد هشام عباس ومصطفى قمر وإيهاب توفيق”.

علاقة تامر حسني وخالد سليم 

وأضاف تامر حسني: “في الفترة دي كنت أنا وتامر وحماقي ماسكين إيد بعض لكن مع الوقت حصل حاجات كتير وتامر عمل لنفسه حتة لوحده وهو عايز يبقى لوحده، فأنا هعمل إيه بس هو بنجاحاته وذكائه هو يستحق إنه يبقى في حتة كويسة جدًّا لكن هو اختار أن يبعد نفسه عننا كلنا”.

وتابع: "مع أني أسمع إنه بيقابل ناس كتير وأنا مستصعب إن احنا نكون نفس الجيل، يعني ما شاء الله حميد الشاعري وهشام عباس وإيهاب توفيق ومصطفى قمر الناس دي لما واحد بيكون عنده مناسبة كلهم بيجروا على بعض دا فعلًا جيل نهاية زمن الخير وللأسف في الألفينيات لما بدأنا نظهر الخير ابتدا يقل شوية شوية لحد لما ما بقاش موجود مع الأسف".

الأزمة الصحية لـ خالد سليم

 
علق المطرب خالد سليم على الأزمة الصحية التي كان يمر بها قائلًا: “أنا نفسيًّا تعبت بشكل كبير كان عندي مشاكل في أحبالي الصوتبة ما كنتش عارف هي إيه ما كنتش عارف أغني ولا أتنفس ولا أنام مرتاح ورحت لأكتر من دكتور وأخدت كرتيزون لمدة كبير جدًّا لأنه أسهل حاجة عمل احتباس للمياه في الجسم”.

أزمة خالد سليم الصحية 

وأضاف: “وزني زاد بشكل كبير جدًّا لدرجة إني ما كانش فيه هدوم بتدخل فيَّ وكنت بلبس ملابس رياضية وفي الفترة دي ما كانش بيتعرض عليَّ أي حاجة تمثيل لأني طويل وكنت ممثل عندي عضلات كويسة فجأة العضلات مع المية بقت ضخمة والناس كانت بتخاف مني”.

وتابع: “صحابي المقربين جدًّا مني سابوا كل تاريخي فجأة بقوا يتريقوا ويتنمروا عليَّ على سبيل الهذار بس دا كان بيأثر فيَّ بالنسبة لي كانت سكاكين، ورُحت البيت دخلت المطبخ فتحت التلاجة كنت باكل وبعيط صعبت عليَّ نفسي جدًّا وتعبت وحاولت أرجع إني أخس والكرتيزون مش عاوز ينصرف والضغط النفسي خلاني أعيط”.

وتابع: "وفي فترة مرضي كان عندي حفلة في الإسكندرية وبعد ما الصور انتشرت لاقيت تعليقات سلبية بسبب شكل جسمي لغاية ما عرفت إني عندي ورم في أحبالي الصوتية وكان المفروض إني أعمل أول حاجة منظار علشان أعرف إيه سبب المشكلة  ورُحت لدكتور محمد حماقي هو اللي عرفني عليه لغاية ما عرفت إني عندي ورم وعملت عملية استئصال"

حقيقة تعاقد خالد سليم مع شركة روتانا

قال خال سليم:" أنا ما تعاقدتش مع شركة روتانا وعمري ما كنت فيها خالص وطبعًا في بداية “روتانا” كنت أتمني أني أكون فيها، واتعرض عليَّ أني أكون فيها  بطريقة غير مباشرة من خلال شركة إنتاج أخرى روتانا اشترتها.

وأضاف: في الفترة النجاح اللي كنت فيها كنت حابب إني أكون في روتانا في الفترة دي جدًّا،  لكن في فنانين كتير أوي رقم واحد آخرين اتهضم حقهم في الشركة زي محمد فؤاد، لكن عمرو دياب عرف ياخد حقه كويس ويعمل العقود حسيت إن في ناس خدت حقها أوي وناس لاء".

رد خالد سليم على شائعات أبناءه

وعلق الفنان خالد سليم على الإشاعات التي طاردته الفترة الماضية التي تخص إنه لديه إبنة ثالثة، قائلًا: نور دي تاني بيبي للعيلة وأول بنت، وهي بنتنتا كلنا، نور مينفعش أقول عليها بنت أختي، وهي السبب إني كنت أتمنى أكون أول خلفتي تبقى بنت، وربنا رزقني بخديجة وكنزي، لما الناس توقفني في الشارع ويتصوروا معايا، بيقفوا جنبي وعايزين يعرفوا ليه بيتصوروا معايا، خيرية مراتي متفهمة، وبيغيروا ساعات من والدتهم.

وتابع خالد سليم: مش بتضايق من الإشاعات وممكن تأثر عليا، وممكن خيرية مراتي تتضايق، وهي عارفة إن أي حد تحت الإضاءة معرضين لتدخل الناس، وديه حاجة ارتضينا بيها، وشغلنا قائم على الإشهار، وبالتالي الناس لما تتكلم بنتقبل، والفترة دي محصلش بيننا خلافات، ممكن خلافات بسيطة.

وعن صعوبات العمل، قال خالد سليم: شغلتنا دي بنقعد لغاية 14 ساعة في مكان شغلنا، أروح أنام ساعة، وأكرر نفس اليوم، وحياتنا بتتسحب مننا، وأصحابنا القريبين بيرموا طوبتنا.