منة شلبي نادمة: دوري في فيلم الساحر كان كارثة

تحدثت الفنانة منة شلبي، عن الكثير من تفاصيل حياتها الشخصية والفنية، وكواليس مشاركتها في فيلم "الساحر" عام 2001 إلى جانب الراحل محمود عبدالعزيز، الذي يعد أول أعمالها الفنية.

تصريحات منة شلبي

اعترفت منة شلبي أثناء حلولها ضيفة في برنامج "سهرانين" الذي يقدمه الفنان أمير كرارة، أنها لم تكن تجيد التمثيل، حيث أكدت أنها كانت كارثة ومُتعبة.

وأشارت أنه تم ترشيحها لجائزة  إيمي الدولية لأفضل ممثلة عن دورها رغم أنها لم تكن تتقن الدور، وأنها في فترة فيلم "الساحر" كانت سمينة لمحبتها لتناول الطعام.

دور منة شلبي في فيلم الساحر 

وقالت منة شلبي، 40 سنة، "أنا كنت كارثة في فيلم الساحر، وزمان كنت تخينة وبحب الأكل جدًا، وخسيت شوية خدوني وخلاص بعدها رجعت تخنت تاني، لدرجة إن أستاذ رضوان الكاشف كان بيقولي هو أنا بصور فيل.. بالمناسبة أنا لسة بحب الأكل لحد دلوقت بس هذّبت نفسي".

وأضافت منة شلبي: "مكنتش مصدقة إن دوري كبير، لدرجة لما شفت السيناريو قولت لأستاذ رضوان، حضرتك متأكد أني بعمل دور نور، وكنت أعرف أن تمثيلي زي الزفت".

تابعت :"كنت مبعرفش أعمل حاجة قدام أستاذ محمود، وكنت أخرج من اللوكيشن بشكل خاطئ، ومكنتش بعرف أتكلم في الفيلم بسبب محمود عبدالعزيز لأني كنت بخاف منه"

منة شلبي عن والدتها زيزي مصطفى

قالت الفنانة منة شلبي:"أمي زيزي مصطفى بالنسبة لي كل حاجة، ومش أم تقليدية وست عظيمة.. ماما لو بتكلم أو عندي صفة كويسة في شخصيتي أو بتحمل مسئولية أو جدعة فأنا كبرت ولقيتها في أمي وهي صفات ورثتها منها".

وتابعت:"بعد لما بقيت فنانة بقيت اشوف اللي عملته زيزي مصطفى كبير وكتير جدا انها في سن صغيرة قررت تسيب شغلها تماما وتتفرغلي انها تكوني كشخص وطالبة وبنت وفنانة، أمي ربنا يحميها وفعلا هي ست استثنائية".

قصة خلاف منة شلبي مع هند صبري

قالت الفنانة منة شلبي:"انا وهند صبري كنا متخانقين ومكنش لينا في بعض أوي، طلعنا احنا الاتنين مع بعض كانت هي بتعمل فيلم مواطن ومخبر وحرامي ومذكرات مراهقة، وانا كنت بعمل الساحر وبحب السيما، وادوارنا كانت جريئة في الفترة دي".

وتابعت:"في الفترة اللى انطلقنا فيها انا وهند صبري كان يجي حد يخلينا نسخن علي بعض ويقولي دي متبحبكيش وانا اقول دي مبتحبنيش ازاي يعني ويقولها نفس القصة، وبعدين اشتغلنا مع بعض فيلم أحلى الأوقات، وكل واحدة فينا كانت كتفها كان عالي علي التانية، بس محترمين، وكان وسطنا حكم اعظم في وسطنا ست البنات حنان ترك".

وتابعت:"برغم اني انا وهند صبري مش قريبين من بعض بس كان فيه ود شديد صنعته حنان ترك لإنها كانت قريبة مننا احنا الاتنين، وخلص فيلم احلى الأوقات لا حرب ولا سلم ومفيش حاجة، وبعدين جالنا فيلم بنات وسط البلد، فالمخرج محمد خان كلمني فوافقت وقلت له مفيش مشكلة وروحنا نعمل بروفة قراءة عنده في البيت بالمعادي واحنا بنفتح النسخة بصيت لهند صبري وقلت لها فيه كلام عايزة اقولهولك وهي كمان قالت لي وانا كمان وعرفنا ان فيه شوية ناس استغلت شوية تفاهة وصنعوا المشكلة ما بيننا ولكن فيه احترام لرحلتنا وشقانا وتعبنا وجرأة في الأعمال عن حب شديد للشغلانة، وتفاهمنا وانتهى سوء التفاهم اللي بينا واتصافينا".