مي فاروق: أول اغنية غنتها كانت لفايزة أحمد.. وأم كلثوم صاحبة أتقل أغاني

تحدثت المطربة مي فاروق عن بدايتها في الغناء، خلال استضافتها في برنامج أنغام وقالت:"وأنا طفلة مكنتش أعرف إن صوتي حلو بس كنت بغني في البيت مع الأغاني بتاعت الأطفال بس أبويا كان صوته حلو وودنه حلوة جدا ولاحظوا علي الموهبة".

تصريحات مي فاروق 

وأضافت مي فاروق":"بابا ابتدى يدخلني في جو اننا نغني بجد ونتمرن علي الأغاني بجد وسمعني ليلى مراد وفايز أحمد وانا عمري 8 سنين رغم أنها أغاني تقيلة علي طفل وكلمات مش مفهومة أوي، وابتديت احفظ الأغاني بتاعتهم وأذاكرها وأقعد اسمعها وأغني معاها".

وأكملت:"يوم من الأيام لقيت إعلان أوبرا الأطفال وقتها بابا قال طب نوديها واهي تتبسط وتضيع وقتها في حاجة مفيدة، وفعلا روحت اتقدمت كان مع المايسترو سليم سحاب وابتديت اتمرن مع الكورال وكان بيمرنا علي حاجات صعبة بالنسبة لوعينا وفهمنا الموشحات وقصائد وأغاني لبناني وحاجات تقيلة وعدت الأيام ولقيت نفسي بقف علي مسرح دار الأوبرا وأنا طفلة في كوال كبير كان أكبر جيل في الكورال وخرج اسماء كبيرة جدا وكنت من المحظوظين أن مشيت في الحتة دي وابتدأت اتعرف في الوسط".
 

أول اغنية غنتها مي فاروق 

وتابعت مي فاروق:"أول اغنية غنتها كانت لفايزة أحمد اسمها خاف الله، وغنتها كلها واللحن كان صعب أوي بس حلو وكان اختبار تقيل اوي وكان عمري 13 سنة، وسبحان الله الناس حبتها مني جدا".

 غناء أم كلثوم

ولفتت:حسيت ان أم كلثوم في جنب لوحدها ومختلفة عن العظماء وهي حالة فريدة واتقل حاجة وأصعب حاجة فقلت اجرب اروح للمنطقة بتاعتها وقعدت اتمرن واحفظ اغانيها وأول اغنية حفظت لها كانت حانت الأقدار وعرفت الهوى".