أحمد الرافعي: مشاركة ياسمين عبد العزيز والعوضي معا يزيد من فرص إنتشار العمل

أعرب الفنان أحمد الرافعي عن سعادته البالغة بمشاركته في العمل، مع الفنانة ياسمين عبد العزيز وزوجها الفنان أحمد العوضي.

تصريحات أحمد الرافعي 

قال أحمد الرافعي: "أحب دائما المشاركة مع الفنانة ياسمين عبد العزيز وأحمد العوضي في أي عمل فني".

وأضاف خلال لقائه ببرنامج "الراديو بيضحك" المذاع علي الراديو 9090: "بحسابات الواقع الجديد الخاص بالسوشيال ميديا والتريندات أعتقد إن تقديم أحمد العوضي وياسمين عبد العزيز لعمل واحد مع بعض بيزيد من فرص الانتشار والترقي بصورة أكبر، وبيخلي فيه شريحة كبيرة من الناس تحب تشوف تجربتهم الفنية مع بعض زي في مرحلة ما الناس كانت بتابع صلاح ذو الفقار وشادية".

وتابع:"ياسمين عبد العزيز وأحمد العوضي شايفني دايما شرير وغالبا لو فيه عمل جديد هيجيبوني برضو شرير إنما أتمنى أعمل أي حاجة تانية".
 

تصريحات أحمد العوضي عن ياسمين عبد العزيز

قال الفنان أحمد العوضي: "أي مشهد فيه كوميديا بيكون فكرة ياسمين عبد العزيز وأنا بمشي وراها في الكوميديا".

وأضاف: "كنت بتخانق وأنا صغير في المدرسة بس اتعملت حاجة إن أي اتنين بيضربوا بعض بيتهانوا وعلشان كدا كنت بحوش بس في الخناقات، بس أنا لو أنا غِرت على ياسمين عبد العزيز لو حد غتت هتخانق وهنا العقل بيعطل والحمية هي اللي بتسحبني، بس عمري ما أتخانق مع أخويا أصل احنا اتنين واتخانقت لأخويا واحنا صغيرين".

وفاة والدة أحمد العوضي 

ولفت: "أمي ماتت وأنا صغير كان عندي 9 سنين فأبويا هو اللي رباني أنا وأخويا وعلشان كدا ممكن تكون شخصيتي ناشفة شوية لإني تربية راجل وما كانش فيه أم، اتربينا في بيت بسيط مساحته 60 متر، ولما جيت اخترت أبقى ممثل أعطاني والدي الحرية أبقى أختار زي ما أنا عايز بس محمل بالتجارب في عين شمس ولغة الشارع وأي حاجة بنجح فيها بنزل آخد صداها من منطقتي وكل أسبوع بروح هناك بس بالليل متأخر شوية، وأنا منتمي لعين شمس علشان الناس اللي هناك، وأنا على الفيس بوك بقول الجمهور دول إخواتي".