عمرو مصطفى: أنا بحب رامي صبري بس سرق حقوقي.. مينفعش أبقى حلو معاه

أعرب الفنان عمرو مصطفى عن غضبه من تصريحات المطرب رامي صبري، بسرقة لحن أغنيته "رقصة"، قائلًا: "أنا ما ينفعش من شوية اغانيَّ كلها بتتسرق ونزلتها من سنة ولقيته بيقول لي دا أنا عاملها من 2016 طيب أنا عايزك تطلع يا رامي أي حاجة تثبت إنك عاملها في 2016 أو 2009 زي ما قلت في تصريحات تليفيزيونية وأي آلة بتسجل عليها بتوثق التاريخ".

خلاف رامي صبري وعمرو مصطفى

وأضاف خلال الجزء الثاني من لقائه في "حبر سري" الذي تقدمه الإعلامية أسما ابراهيم: "أنا بحب رامي صبري، بس ما ينفعش حد ياخد حقوقي وأبقى حلو معاه مش ممكن، أغنية رقصة نزلت وهو بارك لي عليها".

سرقة ألحان عمرو مصطفى

وتابع: "فيه ملحنين كتير سرقوني غير رامي صبري، وأنا ما بعرفش أسكت، فيه سرقات رهيبة عن الحان كتير ليَّ".

واستكمل عمرو مصطفى: "رامي صبري كلمني قال لي معلش علشان خاطري شكلي مش حلو وأنا كنت عامل الأغنية، وعاملها ومش عاملها طيب هات لي اللي يثبت إنك عاملها، أما أنا لو عايز أشيل له الأغنية من على يوتيوب هشيلها له، الأغنية ناجحة علشان أنا اللي عاملها بس أنا سيبتها له بمزاجي بس هو كان زود كنت هوقفها وبكرة الصبح هبلغ اليوتيوب إن دا لحني ونازل على يوتيوب قبله ومفيش حاجة اسمها توارد أفكار دا واخدها بالظبط، وأغنيته بعنوان يمكن خير جايبة 35 مليون مشاهدة وأنا أغنيتي رقصة جابت 4 مليون مشاهدة بس هما الاتنين لحني وجملي اللحنية، وفيه نفس الأغنية خد جملة لحنية أخرى من وائل كافوري وانا بقيت مباح، اقسم بالله ما هسيب حد ياخد جملة لحنية مني تاني".