لماذ انفصلت بعد 6 شهور زواج وسبب عدم العمل مع شقيقها؟.. إيناس مكي تكشف المستور
أشارت الفنانة إيناس مكي، إلى رأيها في ابتعاد الفنانة عبلة كامل عن الوسط ورفضها التكريم خلال الفترة الماضية، بعد تعاونهما في مسلسل لن أعيش في جلباب أبي.
تصريحات إيناس مكي
وقالت إيناس مكي خلال تصريحات تلفزيونية: "عبلة كامل من الشخصيات الجميلة المعشوقة من الجماهير، كانت الأخت الطيبة الجدعة، أنا مش مندهشة من موقفها وعلى مدار السنين اللي فاتت لو قلتيلي أنها قفلت التليفون ومبقتش بترد على الناس مش هستغرب، أنا اتطمنت عليها من حبي فيها وعرفت إن هي مش زي ما بيتقال مبيجلهاش أدوار هي عاملة ستوب".
وأضافت: "كنت برد على الناس وأقولهم احنا ستات في النهاية عادي، ما أنا جالي قفلة وقعدت سبع سنين مش بشتغل ومش عايزة أرد على الوسط".
غياب إيناس مكي عن الوسط الفني
وتابعت إيناس مكي: "السبع سنين دول كانوا كرم من عند ربنا إني آخد بالي من أمي صحيا وكان ربنا هو اللي بيستف الأوراق وطلعت عايزة قلب مفتوح ودا عايز حد مركز وخدت أمي لأخويا الكبير في فرنسا خلصنا العملية ورجعنا، ولما بسرح بقول سبحانك يارب أنا لو كنت بشتغل مكنتش هاخد بالي".
أما عن سبب عدم عمل إيناس مكي مع شقيقها الفنان أحمد مكي، أجابت قائلةً: "رديت على النقطة دي في جميع اللقاءات التليفزيونية، أنا بنت المهنة من 26 سنة فاتوا طبيعي لو انتي شخص مشهور وأخوكي ميجا ستار، الناس هتفضل ترغي وتهري في نفس المنطقة، الناس في مرة طلعونا متخانقين، وطلعونا واخدين قرار منشتغلش مع بعض والله ما حصل، وطلعوا فيه بينا مشادات، وهو راجلي وسندي واللي ليا في الدنيا وصلت إنهم قالوا ليه مفيش صور ما بينهم دا، انتو ناس غريبة جدا".
فشل الحياة العاطفية لـ إيناس مكي
تحدثت الفنانة إيناس مكي، عن سبب فشلها في حياتها العاطفية وطلاقها بعد 6 أشهر فقط من الزواج، قائلة:" لما اتجوزت كان عندي 29 سنة، حياتي واضحة ومتظبطة وكنت نجمة ومكنتش متخيلة إنها تفشل، مع العلم أنه ابن ناس ومحترم وسأل عليا بعد 15 سنة يطمن عليا وفي بينا مودة".
وأضافت:" لقيت نفسي بمنتهى الأدب والذوق بديله كل حاجته وبقولوا خلينا أصحاب وسيبني في حالي يمكن أنا عصبية شوية يمكن أنا اللي مبستحملش يمكن العيب فيا بس مكنتش مستريحة وعمري ما هسيب نفسي في حاجة مش مستريحة فيها، وموضوع الجواز دلوقتي اتقفل وكل ما حد ينكش في الموضوع وافتح الباب ألاقي استفزاز وهي هي نفس الطريقة، أنا حزينة إن نسبة كبيرة من صحباتي اللي أعرفهم بعد سنين طويلة برضوا بيتطلقوا".
رأي إيناس مكي في ويجز
تابعت:" ويجز بحبه جدا ولفت انتباهي، ومستغربتش اللون بتاعه وشدني أنا شخصيا وما شاء الله الجيل الجديد لقيتهم حافظين كل الجمل ورا بعض".
وعن المقارنة بين شقيقها الفنان أحمد مكي ومؤديين الراب، تابعت إيناس مكي:" أحمد في أغاني الراب أو التمثيل أو الكتابة في حته لوحده، وأغلب مطربي الراب بيشتروا الكلمات لكن أحمد مكي بتكون فكرته وهو اللي بيكتب الكلمات وأغنية ولعانه كانت إخراجه ودي هتتحسبله إن سكة الإخراج دي أول حد يعملها في مصر هو أحمد".
