عايدة رياض: اتجوزت محرم فؤاد وهو أكبر مني بـ 20 سنة ومكانش بيخلف

كشفت الفنانة عايدة رياض العديد من التصريحات الصادمة، عن علاقتها بزوجها محرم فؤاد، قائلة: "لما محرم فؤاد طلب يتجوزني مكانش فيه ما بيننا قصة حب ولا علاقة عاطفية، قبلها بشهرين كنت مخطوبة من شخص بحبه، بس الموضوع مكملش، فقلت غيظا فيه هتخطب لمحرم واعمل خطوبة ويشوف بقى أنا هتجوز مين".
 

زواج عايدة رياض ومحرم فؤاد

وأضافت: "محرم فؤاد لما خطبني كان أكبر مني بـ20 سنة، وهو كان متجوز قبل كدة، وعنده ابن اسمه طارق، وبعد ما اتجوزته بشهرين كنت بحبه جدا وهو كمان كان بيحبني أكتر".
 

مشكلة الإنجاب

وتابعت عايدة رياض: "اتجوزت محرم فؤاد لمدة 13 سنة، واللي خلى الجواز ميستمرش أولا إني مخلفتش منه، ومكنتش رافضة الإنجاب خالص، وهو مكانش بيقول ظروفه.. هو خلِّف بالعافية، وكنت باروح للدكتور أكشف، ولما آجي أقول له روح للدكتور يرفض، ولو كنت أنجبت منه كان ممكن زواجنا يستمر، وفيه حاجات مقدرش أقولها عن علاقتنا الزوجية ولكنه رجل مصري صميم وطيب".

صدمة عايدة رياض في محرم فؤاد 

ولفتت: "مع العشرة لقيت شوية حاجات اتصدمت فيها بعد جوازي من محرم فؤاد، وكنت بحس بعدم الأمان معاه، وكمان فيه اختلاف في الديانة، وحسيت إن المستقبل مش مريح، والبيت اللي كنا قاعدين فيه إيجار، ومكانش فيه مكان ليا وأنا كنت صغيرة".

وأشارت: “أنا لما تجوزت محرم فؤاد قعدت في البيت ومنزلتش خالص وجالي فيلم "الغول”، بعتهولي الزعيم عادل إمام لحد البيت مشفتهوش ولا عرفت أشتغله، واكتشفت محرم في مواقف معينة حاجات صدمتني، وقلت ليه قعدت في البيت وأبطل تمثيل".

غيرة محرم فؤاد على عايدة رياض

ولفتت عايدة رياض:"محرم فؤاد قعدني في البيت بسبب فارق السن ولإنه رجل غيور أوي وخايف عليا، وأنا اتصدمت بأكتر من حاجة شخصية معاه".

وأشارت عايدة رياض: "ضربني علقة سخنة في لندن خلال فترة الخطوبة بعد لما سمع مكالماتي لطارق اللي كنت بحبه، وسمعني وأنا بقوله مش طايقة أكمل مع محرم، وياريت نرجع لبعض وأنا بحبك، ولكن بعد ما ضربني اتجوزنا

وتابعت:"كان فيه غيرة فنية بين عبد الحليم حافظ ومحرم فؤاد، وجوزي كان بيحب ميرفت أمين وسافر ورجع لقاها اتجوزت عمر خورشيد.. وكان هيتجوز نيللي".