نورهان منصور: اتعرضت لمواقف إجبار وتسلط وضربت واحد اتحرش بيا
تحدثت الفنانة نورهان منصور عن تفاصيل حياتها الشخصية وأعمالها الفنية، أثناء حلولها ضيفة على أحد البرامج الحوارية، وتحدثت خلال الحوار عن تفاصيل علاقتها بشقيقتها التوأم الفنانة رانيا منصور، وحياتها الشخصية.
تصريحات نورهان منصور
قالت نورهان منصور:"أنا درست مسرح بس كنت حابة اشتغل ورا الكاميرا، لكن رانيا أختي من البداية هي اللي كانت محددة إنها عايزة تمثل، ولكن أنا وهي عملنا مع بعض مسلسل نصيبي وقسمتك، ونقدر نقول إن رانيا هي اللي ساعدتني".
وأضافت:" نصيبي وقسمتك كانت رانيا بتقوم بدور الأخت والممثلة التانية اعتذرت على آخر لحظة، والمخرج قال طالما رانيا ليها أخت توأم ما نطلعهم توأم وأنا أعمل الدور، وملحقتش أحضر خالص للشخصية وكان تحدي صعب أوي، لأنهم اتفقوا معايا على الدور قبل التصوير بيومين، ولكني اتبسطت جدًا بالتجربة وردود الأفعال عليها".
وتابعت:"علاقتي بـ رانيا جميلة وإحنا أصحاب وفي مواقف كوميدية كتير بنتعرض ليها بسبب الشبه، وأنا بعتبرها صديقتي المفضلة".
واستطردت:"أكتر حاجة بتواجه الستات تأييد الحرية، زي إن بنت أهلها يمنعوها من تحقيق حلمها وممكن جوزها أو أخوها يمنعوها.. اتعرضت لمواقف كان فيها إجبار وتسلط وتحكم وغيرة وانتقاد ولوم ولكن مش من أهلي".
واستكملت:" دور أهلي في الدعم قوي جدًا، ودايمًا كنت بشوف في حياة أصحابي كتير أهلهم كانوا بيتحكموا في اختياراتهم، ولكن أهلي مش كده خالص وعمرهم ما اتدخلوا في اختياراتي أنا وأختي، حتى في الاختيارات المصيرية وده خلاني على مستوى كبير جدًا من المسئولية".
وتابعت:" ضربت واحد اتحرش بيا قبل كده، ورد فعلي وقتها كان تلقائي بصراحة.. أهم حاجة في حياتي إني أكون على اتصال قوي بـ ربنا وده بيفرق معايا جدًا بيحققلي نشوى كبيرة وبحس بدعمه ليا أوي، ولما بقصر برجع بشوق كبير أوي".
واستكملت:" مش عارفة ليه الناس واخدة فكرة عني على السوشيال ميديا إني بنت بحب الفاشون واللايف ستايل والسفر، ولكن أنا بحب السفر والدراسة والقراءة جدًا، أنا ملتزمة ومنظمة أوي بزيادة".
