أحمد فهمي: هنا الزاهد "باربي" بـ صوت علي الشريف.. الكوميديا أصعب الأعمال

تحدث الفنان أحمد فهمي عن أحدث أفلامه مستر إكس، والذي تم عرضه في موسم أفلام عيد الأضحى 2023.

تصريحات أحمد فهمي

وقال أحمد فهمي، خلال لقائه ببرنامج الحكاية للإعلامي عمرو أديب: "في البداية كنت بعمل فيلم تاني خالص غيره، وبعدين لقيت فادي دخل عليا وقالي حلو الفيلم ده، قالي فكرة الفيلم، وقولتله الغي الفيلم وأنا هعمل ده، والحمد لله، وأوس أوس أول واحد كان معايا في الشغل، وبدأنا في تجميع أبطال العمل".

وأضاف فهمي: "الحاجات اللي بشتغل عليها مش بحب أنزل اسمي عليها، في مؤلف وفي فكرة لمين، ولازم أتكلم مع المؤلف، وعايز أشكر محمد السبكي، علشان مش بيفرق معاه أي حاجة غير إن هو عايز يعمل فيلم حلو، وقولتله عايزين نعمل فيلم كوميدي صورته حلوة جدًا، ويبقى نقلة لينا كلنا على مستوى الصورة، وطول الوقت بيخاف على الصناعة، ومواقف ضيوف الشرف كلها كتبناها من غير ما نعرف مين اللي هيعملها".

أفلام عيد الأضحى المبارك

وتابع: "أفلام العيد كلها كانت كبيرة وأول مرة يحصل في العيد، ولو في فيلم واخد إيرادات كبيرة لازم تعرف واخد كام شاشة عرض، تامر حسني نجم كبير وعلى راسي، وكريم عبد العزيز، والفيلم لما راح الخليج بياخد نفس قاعات العرض، وتقدر تقول مين جاب أكتر ولا أقل".
 

واستكمل أحمد فهمي: "لما بصحى بلاقي أكتر من حاجة معرفش أنا رقم كام في مصر، في السعودية بنقدر نعرف الإيرادات، وفي الآخر الشاشات اللي خدتها في مصر، ولو ادتوني شاشتين، هشتغل وأنجح، وفي آخر الصيف جمع كل حاجة وقولي أنا ترتيب كام، ولو الأخير".

علاقة أحمد فهمي و هنا الزاهد في العمل

قال فهمي: "في لغة بنتكلم فيها أنا وهنا بنغير أول حرف ونحط س، وهي بتعرف تقول الإفيه بوزنه، وبتقوله زي الولاد عادي، وصوت مش لايق على الشكل، تلاقي باربي بصوت علي الشريف، والفيلم قايم عليها".

وكشف أحمد فهمي عن رأيه في إنضمام إمام عاشور إلى النادي الأهلي، مؤكدًا إنه سيدعمه بشكل كبير لإنه لاعب بالنادي الأهلي.

وقال: "رمضان مشي عادي، والجمهور لازم يعرف إن اللاعيبة مش زي ما هما فاكرين، الكل بقى مهتم بأكل العيش، وفكرة إن حازم إمام ميروحش الأهلي ده كان زمان، وأنا بحب رمضان صبحي جدًا وبقيت مؤهل إن أي حد يمشي من الأهلي، وبقول للجمهورين شجع ناديك بس سواء الأهلي أو الزمالك، وإمام جه الأهلي هشجعه، ولو مشي راح الزمالك جمهور الزمالك يشجعه".

الأعمال الكوميدية هي الأصعب

وتابع: "الكوميديا صعبة جدًا، بعمل مسلسل اسمه سفاح الجيزة قصة حقيقة، السفاح اللي لسه متعدمش، وقصة تقيلة جدًا، ومستر إكس أصعب من السفاح، هيتعرض في شهر 9، الكوميدي مفهاش هزار، ولو قولت حاجه دمها تقبل هتبقة وحشة، وكل اللي في الأفلام مش جيلي، والفرق بيني وبين كريم عبد العزيز 5 سنين، وبحب أبقى مختلف، ألعب في كل المناطق".