أحمد سعد يصالح المرأه التونسية بطريقته.. ويعلق: حفل قرطاج رد أعتبار ليا

احيى الفنان أحمد سعد حفلا غنائيا مساء أمس السبت، ضمن فعاليات مهرجان قرطاج الدولي في دورته الـ 57.

تصريحات أحمد سعد 

وقال أحمد سعد خلال كلمة لجمهور على هامش حفله في مهرجان قرطاج: "زي ما توقعت طول عمري بحلم أقف على المسرح ده، وسط الناس الحلوة دي فعلا أحلى جمهور في العالم، قالوا عني كلام أنا نفسي مش مصدقة قال بيقولك إيه بيغلط في المرأة التونسية، دي المرأة التونسية أحلى حاجة في الكون، إيه يا جماعة أنا مش هقول كتير أنا كتبت حاجة من قلبي".

أغنية أحمد سعد لـ المرأه التونسية

وغنى أحمد سعد أغنية وجهها للمرأة التونسية قال فيها:

"أنا بقول سألت عن أصل الجمال قالولي هي
هي الشهامة والجدعنة والأصول والحلاوة هي
الأصل منها هي والاحترام هي
وجيت وشفت بعينيا طلع اسمها تونسية"

وقال أحمد سعد خلال المؤتمر الصحفى لـ مهرجان قرطاج: "مشروع حياتي كلها هو إن الناس هتحبك قد إيه عشان تقدر تقدملهم وجبة ويقدروا يثقوا فيك، النهارده غنيت أغاني فيها طرب ورقص وحب وحزن، أعتقد إن دي بالنسبة لي هي الرسالة الأسمى في حياتي، إني أخلي الجمهور مبسوط وفي حالة من النشوة والانبساط والفرح، الرسالة بتاعتي موجودة وزاد عليها إني عايز الجمهور يكون مبسوط على قد ما أقدر".

وأضاف أحمد سعد: "حالتي النهارده مكنتش تجربة فنية على قد ما كانت تجربة إنسانية أوي، حسيت الناس بتراضيني وتطبطب عليا عشان كده كانت تجربة إنسانية في غاية السمو والمحبة بيزداد كل مرة للجمهور التونسي ولا يتأثر ولا حاجة تقدر تأثر عليه".

تابع أحمد سعد: "ذكرى دي رمز جوا قلوبنا ولما غنيتلها النهارده عارف حب الشعب التونسي للعظيمة ذكرى، وكان غريب بالنسبة لي إن الناس بتغني ليها بالظبط زي ما كانت بتغني، متوقعتش إني محتاج أحيي ذكرى وسط بيتها، حسيت إني والجمهور بنغني الأغنية زي ما هي بتغنيها، حسيت إن إحنا واحد مع بعض، الجمهور أصلا مسابنيش أتكلم من كتر المحبة، أعتقد إن روحها كانت حوالينا وأكيد كانت فرحانة بينا".

واستكمل أحمد سعد:" معلش مبقبلش موضوع رد الاعتبار للمرأة التونسية؛ لأن اعتبارها لم يتزعزع عشان يترد، وغير قابل إن حد يقول إن أنا زعزعت احترام المرأة التونسية، ولكن أنا قولت اتفهم غلط وكان محتاج يتفهم وجهة نظري الصحيحة اللي هي دائمة قبل كده وأثناء المشكلة، هي وجهة نظر واحدة إنها تحترم وعلى الرأس دائمًا، رد الاعتبار بالفهم وطبيعة الأحوال والناس وإن الأشخاص لا تمثل كل العالم والمرأة، دي مشاكل مع أشخاص وليست بوجه عام، رد الاعتبار للفهم وليست للمرأة التونسية؛ لأن اعتبارها واحترامها وكيانها ثابت".