أسامة منير يوجه رسالة لـ وزير الكهرباء: حالنا واقف مش عارف أصور.. الدنيا خربانة

أعرب الإعلامي أسامة منير عن غضبه من الإنقطاع المتكرر لـ الكهرباء، وبعث رسالة مهمة لوزير الكهرباء، مطالبا فيها أن يخرج على المصريين، ليشرح لهم أسباب انقطاع الكهرباء، وتطور الأوضاع الحالية.

رسالة أسامة منير لـ وزير الكهرباء

وقال أسامة منير، في مقطع فيديو انتشر بشكل واسع عبر مواقع التواصل الاجتماعي: "حالنا واقف مش عارف أصور.. الدنيا خربانة"

وأضاف الإعلامي أسامة منير في رسالة وجهها لوزير الكهرباء: "آسف إني بصورلكم في الضلمة لأني معنديش كهرباء في المكتب، الكهرباء قطعت، وعايز أسأل الامتحان اللي نزلتهولنا وزارة الكهربا بورقة المواعيد، دا معناه أيه، دي حاجة ما خدنهاش في المنهج هنجاوب عليها أزاي".

تصريحات أسامة منير 

وتابع أسامة منير "بما أن المنهج كان صعب أوي للدرجة دي، عايز أسأل حضراتكم وممكن تجاوبوني، هي من إلا عشرة إلى و10 هتقطع، ولا من إلا عشرة هتقطع ساعة، أو و10 هتقطع ساعة، أو من إلا عشرة حتي و10، أو أي وقت هتقطع ساعة، طيب من إلا عشرة حتي وعشرة أي ساعة. يعني الصبح الظهر أو بالليل".

وأكد أسامة منير: "طيب خلوا التحميلات دي... مش عارف، أحنا حالنا واقف، عندي حاجات مش عارف أصورها، حاجة تحزن، دي أشغال وشركات والدنيا خربانة".

وتابع: "أنا النهاردة مينفعش أبقى عايش بالشكل دا، وعندي سؤال (هو انقطاع الكهرباء بقى رسمي؟) أول مرة في حياتنا نشوف انقطاع الكهرباء بقى معتمد بجدول، هو أحنا وصلنا للجدول وصلنا لأن يكون انقطاع الكهرباء بجدول رسمي!".

وفي رسالته لوزير الكهرباء، قال أسامة منير: "السيد وزير الكهرباء تهل علينا بطلعتك البهية، تقول لنا أي حاجة، تحكي لنا، يمكن نتعاطف معاك ونحس بحجم الأزمة، أنما تسيبنا كدا"

وأضاف منير "حاجة تانية: المستشفيات اللي فيها عمليات جراحية، والناس اللي علي أجهزة تنفس صناعي، والناس اللي في العناية المركزة، والأطفال المولودة وكبار السن، هنعمل فيهم أيه.. دي مصيبة في حد ذاتها!"

وقال أسامة منير: "الحمد لله طبعًا ونشكر ربنا، إن حفلة الأستاذ تامر حسني والاستاذ عمرو دياب لم ينقطع فيهم الكهرباء، لأن لو انقطعت الكهرباء في الحفلتين كان حدث تحرشات، وكانت بقيت مجازر في الحفلة"
كما طالب أسامة منير من وزير الكهرباء أن يتحدث للمصريين عن حالة انقطاع الكهرباء، فقال: "أسأل وزير الكهرباء يتعطف علينا ويصور لنا فيديو يشرح لنا فيه الوضع لنتعاطف معك ونتحمل، كلنا نقدر نتحمل المسئولية وكلنا بنحب بلدنا ونتحمل بلدنا وعايزين نشوفها أحسن بلد في الدنيا، لكن شاركونا الحدوتة، والفكرة، علشان نفهم"