درة: الجواز مينفعش يكون هدف.. ومعنديش حاجة أتحسد عليها
كشفت الفنانة التونسية درة عن العديد من الأسرار في حياتها الشخصية لأول مرة، وتحدثت عن فكرة الزواج.
وقالت درة زروق في تصريحات تليفزيونية: "الجواز مينفعش يكون هدف حياة البنت ولو معملتش دا يبقى محققتش حاجة، بالعكس ممكن السنجل تكون مبسوطة وأنا عملت أغنية من زمان مع أبلة فاهيتا عشان أقول كدا، ومش لازم البنت تتجوز عشان تفرحوا بيها وممكن تفرحوا بنجاحها ودراستها".
تصريحات درة زروق
وأضافت درة: "أنا مكنتش رافضة الزواج أبدا، ولكني شخصية مترددة في كل شيء حتى في شغلي كمان حتى بعد ما آخد القرار ممكن أغير رأيي، أما عن إمكانية دخولها عالم الغناء، علقت درة، قائلة: أنا بحب المزيكا جدا والغناء ولكني مش مطربة".
حديث درة عن الحسد
وتحدثت درة عن الحسد، قائلة: "أنا بيحصلي حاجات كتير ومعرفش سببها يمكن قدر مش شرط حسد، وأنا معنديش كل حاجة عشان أتحسد وزي كل الناس مفيش سبب يخلي حد يحسدني".
وتابعت درة: "أنا نفسي أثق في نفسي أكتر ولكن الناس بتفتكر إني مغرورة، ودا سببه إني بتكسف وفي حالي وبتكسف أكلم حد وأي حد يعرفني في الحقيقة بيعرف إني مش مغرورة أبدا، وخجولة جدا وعمري ما بشتم ولا بضرب ولا باخد حقي وبيكون نفسي آخد حقي لأني أكيد هقدر، وبقول لكل اللي بيهاجمونا على السوشيال ميديا وبيستحلوا الكلام عننا إن الفنانين مش بيردوا لأنهم بيترفعوا عن الجدال وبيتجاهلوا إنما مش معناه إنهم مش عارفين يردوا".
ووجهت درة العديد من النصائح للسيدات بخصوص الموضة، قائلة:" لازم المرأة تختار اللي يناسبها ويناسب استايلها وشخصيتها ومش مجرد تقليد وخلاص وتعرف تنسق الملابس والألوان بدون ما يكون مبالغ".
