هنا شيحة عن الهجوم على حلا: حاجة متخصنيش وأنا مش المحامية بتاعتها

تحدثت الفنانة هنا شيحة، عن الانتقادات التي تعرضت لها شقيقتها حلا شيحة، بعد خلعها الحجاب خلال الفترة الماضية ومحاولة عودتها للفن.

علاقة هنا شيحة بـ شقيقها حلا

وقالت هنا شيحة خلال تصريحات تلفزيونية: "إحنا إخوات برا الوسط الفني، لكن أنا كفنانة مليش علاقة بيها كفنانة، وهي ليها اختياراتها وحياتها ومينفعش أتدخل في ده.. أو يبقى ليا رأي سواء كان مع أو ضد".

وأضافت هنا شيحة: "أنا مبتدخلش في حاجة متخصنيش.. بشوف إن كل بني آدم مسئول عن نفسه، في ناس بتقولي إنتي أختها.. بس أنا مش المحامية بتاعتها ولا المتحدثة الرسمية، فياريت محدش ياخد رأيي ولا يسألني عن المواضيع الخاصة دي".

تصريحات هنا شيحة 

وأضافت هنا شيحة: أنا مبدخلش في الحياة الشخصية لأي شخص وكل شخص ليه الحرية  في حياته الشخصية، وإحنا مش شغلتنا نتحكم في بعض ولا نحكم على بعض ولا نجلد بعض، علاقة الشخص الدينية دي بينه وبين ربنا، أنا مالي مبتدخلش في حياة حد، ولا مرة طلعت اتكلمت في موضوع أختي ولا موضوع أي فنانة المواضيع الخاصة دي أنا مبتكلمش فيها.

حلا شيحة وشائعات ارتباطها

وردت هنا شيحة على شائعات ارتباطها، معلقة: "الموضوع مش سهل بالنسبة ليا ومفيش علاقة حب براجل لكن في علاقة حب لنفسي، وبدأت أبني علاقة إيجابية مع نفسي، لأني كنت حزينة من نفسي في فترة ودائما أبحث عن السعادة، ومع الوقت والقراءة اكتشفت السعادة  طلعت من جوايا أنا".

تحدثت الفنانة هنا شيحة عن علاقتها بأولادها، إلى جانب حديثها عن الشخصية التي تتمني تقديمها في عمل فني في المستقبل.

وقالت: "أنا كان حظي حلو لأن والدتي كانت بتساعدني وقت التصوير، وأنا من النوع اللي بينسق ما بين الأولاد والشغل، ودلوقتي هما كبروا وعارفين إني بشتغل ممثلة فخلاص مباقوش بيضايقوا خالص، ودائما بقول الحمد لله إن زمان كان عندي وقت أكتر أكون معاهم".

علاقة هنا شيحة بـ أولادها

وتحدثت هنا شيحة عن الشخصية التي تتمنى تقديمها:" أكتر عمل نفسي أقدمه هو دور سيدة قوية ويكون لها تأثير في الوسط السياسي والاجتماعي مثل هدى شعراوي أو الأميرة فوزية، لأن أنا بحب السيدات الأقوياء".

وكشفت هنا شيحة رأيها في فكرة اختفاء الفنانين: "لو حد حس أنه مش مطلوب، فالمفروض يشتغل على نفسه لأن السوق عرض وطلب، وفي ناس بتختفي ولما بتعمل كده الناس بتبطل تشوفهم، واتقال ليا إني بختفي وده بسبب إن مش عجبني اللي بيتعرض عليا فبستنى وده الصح، لكن مش عشان معجبكش المعروض عليك تختفي، لأ لازم تشتغل على حاجة أنت عايزها واعملها، الحركة بركة يعني اللي مش عاجبه المعروض عليه يعمل هو حاجة تانية".