سحر رامي: طول الوقت بكلم حسين الإمام وولادي بيفتكروني مجنونة

قالت الفنانة سحر رامي في تصريحات تليفزيونية في برنامج المنسي المذاع على قناة هي: "زوجي الفنان الراحل حسين الإمام وحشني أوي ونفسي يكون موجود معايا، غيابه مأثر فيا جدا".

تصريحات سحر رامي

وتابعت: "ساعات ولادي بيدخلوا عليا بيفتكروني مجنونة علشان بكلم حسين الإمام".
وأضافت سحر رامي: "طول الوقت بكلم حسين الإمام وباخد رأيه في كل حاجة وكأنه عايش معايا، كان ما بينا تواصل غريب ومحدش بيفهمني غيره "

فيلم كابوريا

وأضافت سحر رامي: "فيلم كابوريا لأحمد زكي من إنتاجي أنا وزوجي الراحل حسين الإمام، ولما جينا نعمل الفيلم مكنش معانا رأس مال كبير، والأرقام المالية مكانتش كبيرة زي دلوقتي، وأجور أحمد زكي ورغدة بسيطة جدا".

واستكملت: "فيلم كابوريا نجح نجاح عظيم جدا، وعمل نقلة في السينما وأخذنا جائزة أفضل فيلم، وأحمد زكي كان في أحسن حالاته، ورغدة كانت رهيبة وأغنية العمل كسرت الدنيا، وأنا مكنتش هاعمل الدور بتاعي لإن كنا مقررين؛ أنا وحسين الإمام إننا ننتج ومنشاركش في التمثيل علشان ميتقالش بيشغل مراته وأنا مش البطلة، ولكن خيري بشارة أصر إني أعمل الدور".
 

كواليس فيلم كابوريا

واستطردت: "خيري بشارة كان شايفني في الدور بفيلم كابوريا، وفريق العمل كله كان كويس وبذل مجهود جبار في الكواليس، وكلنا كنا في أحسن حالاتنا في التمثيل". 

حقيقة مقاضاتها لـ هيثم أحمد زكي

وأشارت:"هيثم أحمد زكي كان عايز يعمل جزء ثاني من فيلم كابوريا، ولكن غير صحيح ما نشر إني قلت لو عمل كده هقاضيه، ومعرفش أصلا حاجة عن الموضوع ده من أساسه وأنا مش من حقي أقاضيه لأن الحقوق الفكرية ملك عصام الشماع، ولو حد أخد حتة من كابوريا هيدفع فلوس لإنه ملكي أنا"

وتابعت الفنانة سحر رامي: "أول بداية ليا كانت مع الفنان محمد صبحي من خلال مسرحية المهزوز، وبعدين مسرحية أخرى اسمها انت حر، ثم عدت إلى فرقة الباليه، ودخلت في الإعلانات".

بداية معرفة فؤاد المهندس

وأضافت : "لما عملت إعلانات حققت نجاح كبير، وبدأت أتعرف في الوسط الفني وبدأوا يعرفوا اسمي وشهرتي، وبعد كده فؤاد المهندس عرفني من الإعلانات وقالهم هاتولي البت بتاعت الشراشيب لإنه مكنش يعرف اسمي".

وتابعت سحر رامي:"بعد الإعلانات اشتغلت مع الفنان فؤاد المهندس في مسرحية قسمتي، وبعد كده عملت اعلانات تاني وفوازير وخلال الفوازير كان فيه مسلسلات ومسرحيات".
 

رأي فؤاد المهندس في سحر رامي

ولفتت:"أول لقاء جمعني بفؤاد المهندس كان في مسرح الزمالك، واتعرفت عليه وقال لي عجبتيني أوي في إعلان الشراشيب بالحركات، وقال لي عايزيني تمثلي معانا علي المسرح واختبرني ونجحت"