دوقت طعم المر.. الشيف هالة فهمي تنهار على الهواء أثناء نعي زوجها: لما أبويا مات محستش بـ الحزن ده
ظهرت الشيف هالة فهمي خلال حلقة برنامجها "ست الحبايب" الذي تقدمه عبر شاشة قناة "هي"، بـ الأسود ويظهر عليها ملامح الحزن الشديد، إلى أن دخلت في نوبة بكاء وانيهار أثناء نعيها زوجها الذي رحل عن عالمنا خلال الأيام الماضية، موجهة له رسالة مؤثرة.
انهيار الشيف هالة فهمي أثناء نعي زوجها
وقالت الشيف هالة فهمي:" النهاردة مكنتش متخيلة أبدًا إني هقول كده، إيهاب مكنش بس جوزي ولا عشرة عمري، ده كان أبويا وأخويا وابني كمان، أنا اتجوزته وأنا عيلة صغيرة، وعيشت معاه أكتر ما عيشت في بيت أبويا، ولما أبويا مات محستش بالإحساس اللي أنا فيه ده، حتى الزعل والحزن على أمي وأبويا غير اللي أنا فيه دلوقتي".
كلمات مؤثرة من الشيف هالة فهمي
وتابعت: "أنا الفترة اللي فاتت دي دوقت طعم المرار، وكنت حاسة إني بقيت لوحدي بالرغم من كل الناس اللي كانت حواليا، أول مرة أطلع حلقة وهو مش قاعد دلوقتي بيتفرج، كان عنده ميعاد الحلقة ده ميعاد مقدس، حتى الفترة الأخيرة كان بيبقى تعبان جدا ومش مركز أو بيغيب عن الوعي، كان أول ما ميعاد الحلقة تيجي يشاور ليهم على التلفزيون علشان يشغلوا الحلقة، كنت بخلص الحلقة واجري عليه احكي له اللي عملته، وفي الأيام الأخيرة كان سامعني بس مش مركز كنت برضو بحكي له، كان ونيس وعشرة العمر وحبيب العمر بجد".
واختتمت باكية: "ربنا يجعل كل الألم والعذاب اللي كان فيه في ميزان حسناته وشفيع ليه.. كان عشرة عمري".
