أزمة في خضرة المحشي بسبب ارتفاع الأسعار وقلة المعروض.. والشعبة ترد

بجنيه شبت وكزبرة وبقدونس.. جملة لازمت السوق المصري والسيدات المصرية، وكادت أن تختفي في الوقت الحالي، بسبب ارتفاع في أسعار ونقص في المعروض، حيث نشأت أزمة جديدة تلقي بظلالها علي سوق الخضراوات، أثارت الجدل بين المواطنين نتيجة لنقص المعروض من الخضر التي يستخدمها المواطنون في طعامهم اليومي خصوصا أكلة المحشي الشعبية وارتفاع سعره من نصف جنيه إلى 3 جنيهات ويزيد في مناطق مختلفة.

قالت الدكتورة شيرين علي زكي رئيس لجنة سلامة الغذاء بنقابة الأطباء البيطريين: اللي عايز يعرف حالنا وصل لفين يتابع أزمة خضرة المحشي.

أسعار البقدونس والشبت والكزبرة

وأوضحت زكي، في منشور لها على موقع التواصل الاجتماعي فيسبوك: بقى لي كذا يوم بشوف بوستات عن السعر المبالغ فيه لخضرة المحشي، الربطة بقت عودين بالضبط وبقت بـ 2 جنيه ونص وفي بعض المناطق أغلى كمان، لحد ما قررت أعمل محشي ونسيت خالص أو بمعنى أدق مصدقتش موضوع الخضرة ده، ولفينا المنطقة كلها على خضرة وملقيناش، وفي الآخر لقيناها عند خضري وكأنها أحجار كريمة الربطتين عبارة عن عودين بـ 8 جنيه.

وتداول رواد موقع التواصل الاجتماعي العديد من المنشورات التي تتعجب من أسعار الخضرة وعدم توافرها، حيث كتب حساب باسم مروة أحمد: مفيش بالعافية لما بلاقيها دلوقتي الحر مبوظها فى الأراضي علشان كده غاليه مش موجودة في السوق.

ونشر حساب باسم سهر علي: مفيش خالص الفترة اللي عدت بتاعة الحر حرقت الخضار في الأرض، وأقسم بالله كنت بلف على الراجل اللي بنشتري منه أكننا بندور على مخدرات بس احنا بنبيعها 3 بـ 10 بس بتخلص على طول، عايزة أعمل محشي ومش لاقية خضرة ابدا هو المحشي ينفع من غير خضرة.

وعلقت دكتورة بمركز البحوث الزراعية، نيفين عيد، هو درجات الحرارة العالية اللي عدينا بيها مكنتش مناسبة لنمو أي محصول ورقي نهائي وخصوصًا إنها محاصيل شتوية (الجرجير والكزبرة والشبت إما البقدونس يستحمل شويه)، ده طبعا تسبب في عدم وجودها بجانب ارتفاع الأسعار بتاع كل السلع بدون مبالغة، يعني أساسا البذور نفسها اللي بتتزرع منها غليت فأكيد المنتج هيغلى، والصح زي ما حضرتك قولتي إن الناس تزرع في البيت والموضوع سهل وممتع وأنا دايما بقول اللي عنده سطح أو أي مساحة يقدر يستغلها سواء في زراعة أو تربية دواجن ليه لا، ده هيوفر عنده سلعة نظيفة وهيعمل نوع من الأمان الاقتصادي لكن في الحقيقة مش هيبقى أرخص هو غالبا هيكون في نفس المستوى أو أقل حاجة بسيطة لأن مدخلات الإنتاج نفسها غليت.