سمية الخشاب: أنا كسولة جدًا لكن لو غبت برجع بحاجة تكسر الدنيا

تحدثت الفنانة سمية الخشاب، عن سبب نجاح أي عمل تقدمه، موضحة أنها لا تحب التكرار أو الظهور بدون فائدة.

وقالت سمية الخشاب خلال لقاء تلفزيوني: "أنا كسولة جدًا، لكن عندي ميزة أشكر ربنا عليها إني لو غبت سنين وطلعت بحاجة بتعمل نجاح كبير، والسر بعد ربنا إني مش محروقة، ومش شغالة عمال على بطال والناس شايفاني ليل ونهار وزهقت من شكلي، ولما تختفي وترجع مرة واحدة بيبقى لك طلة وحشة".

وأضافت سمية الخشاب قائلة: "الفن بالنسبة لي هواية بحبها، لو مهنة كنت هعتمد عليها واضطر أشتغل أي حاجة علشان أبقى موجودة وانتشر ويبقى عندي مصدر دخل، وإن الناس تقول عني غايبة أحسن من إنهم يقولوا محروقة، أو اشتغل أعمال لا تنجح، ولكن لما أغيب وأرجع بحاجة محترمة أنا كده بحترم جمهوري".

وتابعت:" نجاحي جاء بعد مجهود سنين طويلة وتاريخ وسنين من التعب أنك تبني اسمك وتعمل جمهور، وأعمال كتير مميزة وناجحة مع منتجين ومخرجين عارفين يعني إيه يصنعوا نجم، وزي نجاح مسلسل ريا وسكينة لحد الآن بعد 18 سنة من عرضه اتفاجأت انه طلع تريند تاني شهر كامل على السوشيال ميديا، وهو من إنتاج العدل الجروب واللي هي شركة هايلة وكبيرة وناس محترمين وهما سبب من أسباب صنع نجومية سمية الخشاب، ولهم فضل كبير عليا من أول ريا وسكينة ومسلسل ولقاء على الهواء".

وأضافت سمية الخشاب: "كل ده بيخليك تصنع تاريخ وبتعمل لنفسك اسم، والعمل الجيد بيفرض نفسه لأنه مجهود سنين وشقى علشان تصنع اسم وما تكونش متسرع وما تعملش أعمال شبه بعضها وحاجات كتير صعبة وربنا بيوفق أنت بتصنع اسم انت والشركة اللي بتنتج لك وبتخليك تحافظ على المستوى، ومخك وذكاءك بيحطوك في حتة حلوة".

أغنية أركب على الموجة

تحدثت الفنانة سمية الخشاب، عن كواليس أغنيتها الجديدة اركب على الموجة التي طرحتها قبل 9 أيام على طريقة الفيديو كليب بموقع الفيديوهات يوتيوب.

وقالت إنها كانت تتمنى تقديم أغنية جديدة ومختلفة والمخرج إبرام نشأت رشح لها هذه الأغنية لفرقة جديدة تحمل اسم الباور العالي وهي فرقة يتبانها المخرج بلال صبري.

وأضافت: كان نفسي في أغنية صيفية ولذيذة وكنت بفكر في الموضوع، وفي التوقيت ده كنت بصور فيلم التاروت مع بلال صبري اللي متبني الفرقة ولما قال لي اسمها اتفاجأت لكنه قال لي اسمعيها، ولما جربت صوتي عليها حسيت أنها حلوة ومختلفة وجديدة.

وأشادت سمية الخشاب بصناع الأغنية، قائلة: فرقة الباور العالي شاطرين جدا وأفكارهم حلوة ومختلفة، وكلامهم بسيط يشبه كلام الناس في الشارع، مع شوية مصطلحات بيقولوها الولاد اليومين دول ولازم طبعًا نواكب الموجة.

ردود فعل الجمهور بعد "اركب على الموجة "

عبرت سمية الخشاب عن سعادتها برد الفعل على الفيديو الدعائي الذي نشرته للأغنية عبر تيك توك، قائلة: صورت فيديو دعائي في البيت بعيدا عن الكليب، ونزلته على تيك توك وفوجئت بعدد المشاهدات في أول ساعة، وكل ثانية ألقي 10 آلاف مشاهدة، وأول يوم دخل على مليون مشاهدة، وخلال 3 أيام كان مجموع المشاهدات على مواقع التواصل تخطى 13 مليون، وسعيدة إن الناس كانت مشتاقة تشوفني وممتنة لرد فعلهم، وفوجئت بعمل فيديوهات على الأغنية، وحتى الأولاد اللي بيصوروا معايا في مسلسل أرواح خفية عملوا فيديوهات ونشروها على تيك توك.

صعوبات تصوير كليب أركب على الموجة

تابعت: كان صعب نلاقي فندق يوافق نصور عنده في وقت الذروة في شهر يوليو، ونصور على الشاطئ، وصعب نصور من غير ما حد يعدي ويعمل باي باي في الكاميرا، وكان في عز الحر، لكن الحمد لله تخطينا كل الصعوبات وطلعنا بكليب حلو، وكان في صالحنا أن الجو كان مناسب جدًا لمود الأغنية.

وأضافت سمية الخشاب: الأغنية فيها حاجات صعبة كتير وحاجات معمولة جرافيك بشكل متقن جدا، إبى جانب التصوير في درجة حرارة 40، وبوافق على كل حاجة يطلبها مني المخرج معنديش فكرة أقول أنا تعبانة أو مش هعملها أو أستعين بدوبلير، ولما المخرج طلب مني أنط على الترامبولين وافقت حتى هو أحيانا بيقول لي متأكدة أنك هتقدري تعملي ده وبيكون مش عاوز يتعبني، عجبني الترامبولين وفضلت أنط علشان ياخد اللقطات المطلوبة، وبعدها فضلت أسبوعين متكسحة، كإني كنت بعيدة عن الرياضة سنتين ورجعت أتمرن.