هاجم أغاني المهرجانات.. مصطفى قمر: أنا مقصر في حق محمد منير
تحدث الفنان مصطفى قمر، عن عدة مواقف مع عدد من زملائه في عالم الطرب والغناء، وكذلك كشف عن رأيه في أغاني الراب والمهرجانات.
تصريحات مصطفى قمر
وقال مصطفى قمر، خلال لقاء له مع الإعلامية سهير جودة، عبر حسابها على فيسبوك، قائلًا: "أنا كلمت حمزة عشان أباركله على ألبومه الأخير، وقولتله يلا نقعد، وحاسس إننا بنقدم أغاني شبه بعض وممكن نقدم حاجة كويسة بيننا في الفترة الجاية، وهو فنان موهوب وبيختار كلام حلو جدا".
وجول المطربين الذي يفضل سماعهم، أضاف مصطفى قمر، قائلا:" بحب أسمع فيروز، دي رقم واحد عندي، هى في مدرسة لوحدها، وفي الجديد أحب لو هتسلطن أسمع صابر الرباعي، وكاظم الساهر شايفه إنسان راقي والرقي ده مش بنشوفه كتير، ومهذب ومحترم، ولما قابلته فنان جميل".
وتابع مصطفى قمر، عن الكينج محمد منير: "أنا طلعت من عباية محمد منير، ده الأستاذ واللي عرفنا إيه كلمة برا الهجر والحب، عرفنا مجموع مشاعر مختلفة، ونغني للبلد بشكل مختلف، أنا مقصر شوية في حق محمد منير، واليومين الجايين هروح أقعد معاه وندردش نفسي أقعد معاه".
وأضاف مصطفى قمر: "رامي صبري حبيبي وعامل شكل مميز وبقى في نضوج في كلماته واللحن، وهو أستاذ وأنا بحبه، اختياراته الفترة الأخيرة شكلها حلو ولايق عليه، وحفر لنفسه مكانة".
تحدث مصطفى قمر عن المطرب ويجز، قائلا: "بسمع ويجز مع ولادي، بس مش كل الأغاني بعرف أستوعبها، بيعجبنى كوبليهات بس مش دائما".
واختتم مصطفى قمر حديثه، كاشفًا رأيه في أغاني المهرجانات:" المهرجانات زيها زي أي لون غنائي بيطلع، والناس استقبلته بأخطائه، ورغم إن فيه كلمات بذيئة وفيه حاجات صح وفيه حاجات غلط موسيقيا، بس عجب الناس، أنا مش ضد أي نوع من أنواع الفن طالما مش كلام خارج أو ركيك".
الجزء الثاني من حريم كريم
وتابع: "فكرة جزء تاني من حريم كريم ظهرت بإن كان فيه اقتراح نعمل جزء ثاني من الفيلم، وأغلب الناس كانوا مش مصدقين ولا مقتنعين من سنتين كدة".
وتابع مصطفى قمر: "لغاية ما قولت لأستاذة زينب المؤلفة يلا نكتب، قالوا ليا طب هتعرف تجيب علا غانم دي عايشة في أمريكا؟ قولتهم هجيبها وانتم خلصوا الورق وأنا هظبط الدنيا".
وأردف:" قعدنا وكتبوا موضوع حلو جدا ومبشر، والحقيقة زينب عاملة تشابك حلو جدا في الفيلم، لما يكون في 14 ممثل يطلعوا خلال ساعة ونص وكل واحد عايزة يظهر، ويطلع ويقدم دور، والناس مش هتشوف مصطفى قمر لوحده".
واختتم مصطفى قمر حديثه، قائلًا: "الفكرة كانت صعبة في الأول بس بعد كده السيناريو طلع عبقري، وبدأنا نكلم علا وداليا البحيري، بالرغم إن هي في الأول مكنتش مقتنعة، وبتقول معقولة هيتعمل، وانبسطت جدا، وبسمة بجانب الجيل الجديد، وفي أربع أغاني في الفيلم من ألحاني، وفي غنوة دعائية تريند كدة تيك توك".
