اتسجن بسبب أغنية واتمنع من الظهور.. ابنة محمد نوح تكشف أسراره وعلاقته بـ السادات

تحدثت سحر نوح ابنة الفنان الراحل محمد نوح عن علاقتها بوالدها وكشفت العديد من الأسرار عن والدها وعلاقته بالسادات.

تصريحات سحر نوح

قالت سحر نوح : "بابا كان بيقول ناس بتعيش بعد ما تموت وأنا أحب أكون منهم ومش عايز أموت وأنا عايش".

وأضافت خلال لقائها ببرنامج "الستات" الذي تقديم مفيدة شيحة وسهير جودة: "محمد نوح كان ممنوع من الظهور الإعلامي في آخر أيامه وكان حاسس إن اللي عنده أكبر بكتير من اللي الناس عرفته".

وتابعت: "محمد نوح لما طلع بأغنية مدد، كان وقت النكسة، مش وقت الانتصار ودا كان ضد رغبة المسؤولين وقتها لإنهم ما كانوش عايزين حماس الناس يزيد وعايزينهم يهدوا وابتدوا ينزلوا لهم بنوعية معينة من الأفلام المرحة والخفيفة وعايزينهم يهدوا إنما بابا كان ثائر وبيقول مدد وآه يا بلدي وبينزل يغني وسط الناس في الشوارع والجامعة بالعود، وبسبب كده اتسجن".
 

مسرحية كلام فارغ جدًّا

واستكملت: "لما انتصرنا في 1973 غنا مدد، وبابا كان بيحسب على المعارضة لكنه كان معارض حميد مش كاره وبينبه لأشياء ممكن تغيب عن المسؤول، وعمل مسرحية كلام فارغ جدًّا للراحل أحمد رجب بينقدوا فيها التليفونات لما كانت فيها أزمة وفراخ الجمعية ومشكلات مجتمعية".
 

زجاجة رمل سيناء

وتابعت: "محمد نوح لما رحل فيه زجاجة من رمل سيناء كانت جنبه بيشمها وما شُفتش في حياتي حد بيحب بلده زيه، وهو لف العالم ما كانش بياكل غير الأكل المصري وما بيلبسش إلا اللبس المصري، كان متعلق بالبلد". 

وأكدت سحر محمد نوح أن والدها كان يحرص على إقامة صالون ثقافي ينظمه أيام السبت والإثنين والأربعاء يجمع فيه كل أصحاب وجهات النظر والمفكرين، مشيرة إلى أن والدها ساهم في تكوين شخصية أبنائه.

تابعت: "أفتقد كلمته التي كان يقولها دي باستمرار "حبيبة قلب بابا"، والدي كان دائمًا يرفع شعار أن الفنان هو من ينتظر الجمهور وليس العكس، كان يرفض أن يركب سيارة خاصة يوم الحفلات ويصر على ركوب الباص مع الفرق الموسيقية، ودايمًا يقول لنا احنا من غيرهم ولا حاجة".

علاقة محمد نوح بـ السادات

واستكملت سحر نوح: "والدي غنا في فرح كل أبناء الرئيس الراحل أنور السادات، وكان هناك تحول من علاقة ليست بجيدة لصداقة قوية تجمعهما".

وأضافت:"خلال مسرحية كلام فارغ غنا محمد نوح موال اسمه الكوسة، يا بلدنا يا عجيبة فيكي حاجة محيراني نزرع القمح في سنين يطلع القرع في ثواني، والأغنية دي كانت بتطلب منه علطول وبسبب الأغنية اتسجن لإنه بينتقد أوضاع في البلد، وقتها طلب السادات يسمع الأغنية فعجبته جدا وطلب بابا يغنيها وغناها معاه وبعدها جمعتهما صداقة قوية".

اتصال السادات بـ محمد نوح

وتابعت:"السادات مرة اتصل بمحمد نوح فرد عليه جدتي وقالت له مين فقال لها محمد أنور السادات فقفلت التليفون في وشه وقالت عيب وكانت مفكرة حد بيعاكس، لكن في الفترة دي كان فيه صداقة قوية بين والدي والرئيس الراحل أنور السادات".