أسما شريف منير لـ "مصر الآن": لما حلقت شعري حسيت إني أسد.. ومرضتش أشوف التعليقات
أثارت أسما شريف منير، حالة من الجدل، خلال الساعات الماضية، بعدما ظهرت في مهرجان القاهرة للدراما، بدون شعر، حيث حلقت شعرها؛ وذلك بسبب تعرضها لوعكة صحية وتلقيها علاج الغدة، معلقةً: قرار كبير.
حلاقة أسما شريف منير
وقالت أسما خلال تصريحات خاصة لـ "مصر الآن": كنت مبسوطة جداً إني موجودة في المهرجان، وكمان اتبسطت إنهم كرموا ناس كتير مهمين جدا.
وأضافت: كمان لفت نظري تطور العلمين وإن دلوقت في مهرجان قائم بذاته هناك، لكن يمكن الحاجة الوحيدة اللي محتجالها تحصل، إن يكرموا فنانين تانيين أكتر من النجوم الكبار في العمر.
وتابعت: بشوف دايما إن تكريمهم بيأكدلهم إن الناس بتحبهم وفاكراهم ولسة في مجال للعمل من جديد، ودة بيديهم حافز ودفعة قوية جدا معنويا.
وأما عن جدل ظهورها حليقة الشعر، علقت: أنا بس عاوزة أوضح حاجة مهمة، إني بقرأ من مبارح تعليقات وأخبار عن إني خدت الخطوة دي لأني بمر بحالة نفسية سيئة أو محبطة وعندي صدمة وأزمة ودة مش صح.
واختتمت: بالعكس أنا خدت الخطوة دي وأنا سعيدة وباخد خطوات إيجابية بحياتي وشغلي ومبسوطة أوي، وحلقت شعري عشان اثبت إني أقدر أتخلى عن أي حاجة، ولدلوقت مش عاوزة أفتح وأقرأ تعليقات الناس ومرضتش ابص على اي حاجة من إمبارح.
