أكرم حسني عن "العميل صفر": معرفتش أمثل مشاهد الأكشن
علق الفنان أكرم حسني، على فيلمه الجديد العميل صفر الذي حقق نجاحا كبيرا بمجرد عرضه في دور العرض السينمائي، وكذلك تحدث عن سبب انسحاب المخرج محمد سامي من العمل بعد أسبوع من بدء التصوير.
تصريحات أكرم حسني
وقال أكرم حسني في لقاء تلفزيوني: "سعيد إني بفتتح العميل صفر في دبي، لأنه فيلم عزيز على قلبي وطاقم العمل كله بذل مجهود ولم يبخل بشيء والحمد لله شايفين ردود الأفعال جيدة".
ورفض أكرم حسني المقارنة بين فيلمه الجديد وباقي الأفلام قائلًا: "من غير مقارنات لأن مهم الواحد يكون باصص في ورقته وهو شغال وكل واحد يركز في شغله وأي نجاح في أي عمل فني هو مكسب للجمهور".
وعن فكرة الفيلم قال :" حبيت الفكرة، وجت لينا بالصدفة، كنت قاعد مع محمد سامي في الجونة وفي أحد المهرجانات بنكتلم وندردش وطلعت الفكرة في قاعدة، ونزلنا القاهرة لقيته بيقول لي تعالى نقعد لأن الخيوط بدأت تكتمل، وبدأنا فعلًا أنا أقول فكرة وهو يكمل عليها وهكذا لحد ما بقى عندنا فكرة فيلم لذيذ".
وتحمس المنتج وائل عبد الله للفكرة، قائلا: "من المنتجين المهمين وعنده خبرة كبيرة ككاتب ومخرج ومنتج إلى جانب أنه ملم وعارف بالمنتج ده يطلع منه وتحمس للفكرة وبالفعل بدأنا نشتغل عليها".
وكشف أكرم حسني سبب استبدال المخرج محمد سامي بـ كريم العدل، قائلًا:" أنا بعتز بمحمد سامي بشكل شخصي غير أنه مخرج عبقري، مش محتاجين نتكلم عنه.. وأنا بحبه على المستوى الشخصي ولما صورنا حوالي أسبوع وجينا نكمل التصوير محمد بدأ ينشغل فالمنتج وائل عبد الله رجعله فوجد المواعيد ما تسمحش.. فاستأذناه نرشح حد تاني الراجل رحب بكل حب واحترام وكلمنا كريم العدل اللي أنا بحبه ورحب بالفكرة ودايما بقول إحنا خسرنا سامي وكسبنا كريم".
وأضاف: "أنا ومحمد نفسنا نشتغل مع بعض، واشتغلنا مع بعض إعلانين وطلعوا تريند وبدأوا بره يشغلوا الإعلانات دي، وأنا بحبه ونفسي أشتغل معاه دراما وأفلام".
وقال أكرم حسني: "معرفتش أعمل مشاهد الأكشن في العميل صفر.. أنا هعمل أكشن إزاي بالعقل؟ فيه حاجات ما أقدرش اعملها محتاجة لياقة، وفي حاجات محتاجة مدربين ومتخصصين زي واحد بينط من دور لدور المشهد ده عاوز السقا لكن إحنا البني آدميين العاديين لا، وعملت حاجات بسيطة زي مشاهد الغردقة والعوم واليخت والنط".
وأضاف أكرم حسني: "لما كنا بنصور العميل صفر في الغردقة كان بعد ظهور القرش بأسبوع وكنت عامل فيها جريء وفي المياه مرعوب وببص يميني وشمالي وأحاول أنسى.. ولو طلع قرش مش هنعرف نعمل حاجة حتى لو متأمنين.. ولو كان طلع لي كنت هقف عمودي وابص له في عينه واضربه في منطقة حساسة زي ما شفت على السوشيال ميديا، أنا ممكن أعوم على البحر من بره ولكن لقدر الله لو أنا في مكان والمركب غرقت تبقى مصيبة سودة".
وتحدث أكرم حسني عن مشاركة الفنانة السعودية فاطمة البنوي في الفيلم، قائلًا: "من الناس اللي شفت في عينها لمعة الذكاء الفني وهي كاتبة ومخرجة وممثلة ومثقفة وعندها وجهة نظر وأول ما رشحناها كان سعادتي مش طبيعية لأني هقرب منها فنيا وأفهم دماغها.. وكمان سعيد بأسماء أبو اليزيد عندها خفة دم وتلقاية وطبيعية والناس حبوها في السينما ولما كنت بحضر في صالات العرض الناس بتسقف في مشاهد مع أسماء أبو اليزيد".
وأعرب عن سعادته بـ إشادة زملائه بالعمل مثل المخرج عمرو سلامة والفنان محمد دياب، قائلا:" مفيش بينا منافسة كفنانين.. والناس لو تعرف الحقيقة ده مش موجود.. العلاقة اللي بينا منتهى الحب والتعاون وبنفرح لبعض.. وممكن ما يكونش فيه فرص للتعاون القريب، ولكن محمد ممدوح لسه مكلمني قريب قال لي ما دخلتش فيلمك ومستنيك تيجي وندخل فيلمي وفيلمك مع بعض، وحسبة الفلوس مش هي دي أكبر همنا، وكل واحد بيشتغل علشان فنيا يعمل محتوى الناس تتبسط به وممكن يكون فيه تنافس شريف ومش مقصود ومحدش بيبص للتاني".
رد أكرم حسني على طارق الشناوي
رد الفنان أكرم حسني على الانتقادات التي وجهها الناقد الفني طارق الشناوي على فيلمه العميل صفره الذي يعرض حاليًا بالسينما.
وقال أكرم حسني في لقاء تلفزيوني له:" أي ناقد بينتقد بشكل موضوعي بنحترمه ولازم ناخد رأيه في عين الاعتبار ونتعلم من التجربة الجاية ونشوف نكملها بإيه.. وأنا هتقبل نقده وأشوف الجانب اللي أقدر أصلحه في أخطائي ووارد جزء من كلامه محتاج أني أبص عليه.. إحنا مش ملايكة.. والتجربة الفنية ممكن تنجح أو لا وعلينا أننا نتعلم من التجربة شوية الأخطاء ونصلحها"
كما كشف أكرم حسني عن أغاني فيلم العميل صفر، قائلًا:" عاملين تلات أغاني، أعنتين لوحدي وأغنية بتشرف وفخور أني اسمي تحت اسم مدحت صالح هو اللي مغني التتر وأنا بقول جزء صغير فيه".
وأضاف أكرم حسني: "أحيانا في أغاني مش بتكون متوقع النجاح الكبير اللي تحققه، زي أغنية ستو أنا بالنسبة لي اتجاه الكتابة الخاصة بها هي الغزل الكوميدي العفيف، وأنا بشتغل على أغنية ستو أنا قلت إزاي هعمل أغنية تحقق نجاح يتخطى نجاح أغنية بسبوسة في الوصية اللي نجحت لحد ما ربنا كرم وما توقعتش النجاح".
وعن اختياره مفرادات الأغاني قال:" بحاول الاقي مفردات دمها خفيف وتعمل معنى لذيذ وتخدم الأغنية ويبقى سهل على الجمهور يحفظها، وبستخدم مفردات شبه كلام الشارع زي كلمة يا سطى وكلمات مناسبة للناس".
