مستكتر للناس عرقها.. عمرو سمير عاطف يهاجم جمال العدل: سيب الناس تسترزق
خرج المؤلف عمرو سمير عاطف عن صمته، ليعلق على تصريحات جمال العدل الأخيرة بشأن رغبته في تحديد أجور الفنيين والفنانين، متعجباً من سبب تدخله في مثل هذا الأمر.
وقال عمرو سمير مستنكراً: “مش فاهم بالظبط ايه علاقة جمال العدل بتحديد أجور الفنيين والفنانين وليه دايما جمال العدل مستكتر على الناس عرقها وشقاها ؟؟”
تصريحات عمرو سمير عاطف
وأضاف عمرو سمير عاطف: "حاجة غريبة جدا والله ما تخليك ياريس في مسلسلاتك وشغلك وسيب الناس تسترزق طالما بعيد عنك والأخوة المنتجين اللي اجتمعوا وحددوا الاجور وعملوا اللائحة ياتري حددوا برضه مكسب المنتج المفروض يبقى قد ايه ولا بنتشطر بس على الناس الشقيانة ؟".
وتابع: "عن نفسي عندي استعداد اقعد في البيت عشر سنين واكتر ولا اني اتنازل عن مليم واحد من اجري وكل التحية والتقدير للزملاء الاعزاء المحترمين في هندسة الصوت اللي رفضوا الاستغلال والجشع والمفروض ان كل شعبة تعمل زيهم".
تعليق عمرو سمير عاطف على فيلم 'أوبنهايمر"
وكان قد تحدث عمرو سمير عاطف عن فيلم "أوبنهايمر" عبر حسابه بموقع التواصل الاجتماعي فيسبوك، بعدما أثار جدلا كبيرا على مستوى العالم، وكتب عمرو متسائلا: "هل أوبنهايمر فيلم عظيم؟ خليني أقولك إن المجهود اللي اتعمل في الحفاظ على الدقة التاريخية والعلمية خرافي، الفيلم ده ممكن يبقى مرجع علمي مهم لأي حد عايز يعمل قنبلة ذرية، والسيناريو صعب، التقطيع المتوازي بين أزمنة مختلفة، وتحقيقات مختلفة، متعب جدا، ومعمول كويس جدا، لدرجة إنه برضه ها يبقى مرجع لكتاب السيناريو بلا شك".
وتابع: "التمثيل رائع، وخصوصا العبقري جاري اولدمان، طلع في مشهد واحد عمل فيه الرئيس الأمريكي ترومان، وكل حاجة في المشهد ده، كل كلمة اتقالت كانت عظيمة، المشهد برضه اللي كانوا بيختاروا فيه المدن اليابانية اللي هايرموا عليها القنبلتين كان هايل، ومضحك ومأساوي في نفس الوقت، بس هل كل ده يخليه فيلم ممتع؟".
وأجاب عمرو على تساؤله: "مش لأي حد، ومش من أول مرة، وصعب جدا إني أتصور إن فيه حد ممكن يتفرج مرة تانية قبل سنين من المشاهدة الأولانية ليه؟ لأن نولان -في رأي- عايز يقول كل حاجة هو عارفها، مستخسر يتنازل عن معلومة علمية او تاريخية ويفرد مساحة أكبر للدراما والشخصيات، والحوار الذكي بزيادة اللي كل شخصية فيه بتكمل كلام التانية حلو، بس لما يبقى كتير كده يبان مصنوع، وهو مضطر يعمل كده من كتر المعلومات والتفاصيل التاريخية والعلمية اللي عايز ومصمم يقولها".
وأكمل: "أول ساعة تقريبا مرهقة، وممكن تكون مملة لناس كتير، أنا واحد منهم لدرجة إني خرجت من الفيلم واتمشيت شوية في المول قبل الاستراحة، ورجعت لاقيت اني مافتنيش حاجة مهمة إلا يمكن شوية معادلات لكن الساعة التانية أو النص التاني أمتع بكتير".
وختم كلامه: "هل ها يكسب أوسكار ؟ لو ماخدش ستة سبعة على الأقل هايبقى غريب بس كل شيء وارد طبعا. في النهاية عايز أقولك لو داخل الفيلم فلازم تبقى عارف إن مافيش مراجيح ولا ألعاب. فيه دروس فيزياء وتاريخ وأخلاق وسياسة فهات معاك الكشكول"
