ميرهان حسين: للشهرة سلبيات.. وعاوزة راجل حنين يقف في ضهري

كشفت الفنانة ميرهان حسين عن كيفية حفاظها على جمالها، بالقول: بحاول مزعلش على قد ما أقدر وأبعد عن الضغوط وأهتم ببشرتي وصحتي عموما وأكلي ولو قدرت أنام كتير ولو قدرت أشرب ميه وألعب رياضة.

ميرهان حسين تكشف سبب عدم زواجها

وعن سبب عدم زواجها قالت ميرهان حسين على أسئلة متابعيها عبر موقع تبادل الصور والفيديو إنستجرام، من خلال خاصية الأسك: عشان أنا بحب الروقان ومبحبش النكد ومبحبش الزعل وبحترم مساحتي الشخصية وبحترم شخصيتي اللي بنيتها وهذبتها لحد ما بقت الشخصية اللي أنا عليها دلوقتي ولسه ملقيتقش الراجل اللي ميخذلنيش في حاجة من دول.

ميرهان حسين أوضحت أن دائرة معارفها قليلة، وأضافت: عموما أنا مبدخلش ناس كتير في حياتي، لكن ممكن الناس اللي شايفيني صح اللي بيقدروني واللي أقدر أكون على طبيعتي معاهم واللي في ضهري ومعايا في الحلوة والمرة اللي يحفظوا الأسرار واللي أثق فيهم مع إني أعتقد إن بقى صعب جدا جدا تثق في حد وتديله الأمان لإن أي صاحب ممكن يتحول لعدو لأسباب تخصه.

وعن أكثر ما يجذبها في الرجل قالت: أكيد مظهره الخارجي أول حاجة بتلفت نظري بس الأهم إن شخصيته تعجبني، لافتة إلى أن مشروبها المفضل هو عصير المانجا وعصير القصب وعصير البطيخ.

وبسؤالها عن إذا كانت امرأة قوية أم ضعيفة أجابت مريهان حسين قائلة: ميهمنيش أكون قوية ولا ضعيفة أحب أتوكل على الله وهو يتولاني وأحب ربنا يديني بدل القوة قلب رحیم وعقل حكيم ونفس صبورة وقوة أواجه بيها صعوبات الحياة.

 سلبيات الشهرة من وجهة نظر ميرهان حسين

وفيما يتعلق بسلبيات الشهرة قالت ميرهان حسين: الشهرة لها سلبيات كتير منها إنها بتخلي الناس تدي نفسها الحق إنها تحكم عليك وتنتقدك، وأوقات كتير تجرحك وتظلمك لإن انطباعاتهم بتيجي من دور لا يشبه حقيقتك أو صورة بالنسبة لهم فيها شيء يديله الحق إنه يجرحك، كمان بتمنعك تكون على طبيعتك 100 % بره بيتك ودايرتك الصغيرة، وأكبر سلبيات الشهرة بالنسبة لي إنها بتجلب ناس مزيفين على حياتي تكون أهدافهم من معرفتهم بيا إني مشهورة فقط ولسه فيه أكتر بس مش هيكفي.

مواصفات شريك أحلامها 

أما المواصفات التي تتمنى أن تجدها في شريك أحلامها قالت: يقدرني، يحترمني، يبقى سندي يبقى شاريني ومتمسك بيا يصوني وأحس إنه بجد بيخاف وميعيطلنيش ويكون في ضهري ويحسسني ويشاركني أفراحي وأحزاني ويوفي بوعوده ليا ويكون حنين عليا ويخاف على زعلي، ويحسسني بالأمان يكون حنين وطيب وبيحترمني قبل ما يحبني بجنون ويموت في دباديبي ويعشقني عشق العشقنقية كلهم.