اتجوزت علشان أروح ديسكو وبتعالج نفسياً.. غادة عبدالرازق تثير الجدل

تصدرت الفنانة غادة عبد الرازق، التريند عبر منصات التواصل الاجتماعي بعدما حلت ضيفة على الإعلامية منى الشاذلي، مساء أمس الخميس.

غادة تحدثت خلال اللقاء عن تفاصيل مشوارها الفني وحياتها الشخصية، كما فجرت مفاجآت صادمة عن تجاربها في العلاج النفسي، وفيما يلي أبرز تصريحاتها.

غادة عبدالرازق والعلاج النفسي

استهلت غادة حديثها بتجربتها مع بعض الأطباء النفسيين، وقالت: رحت لدكتور نفسي كبير جدًا اسمه عظيم وقولتله وأنا ماشية أنت محتاج حد يعالجك، وخدت الأدوية اللي كتبهالي وانتكست وكنت هرتكب في نفسي جريمة قتل.

وأضافت: لازم أروح لدكتور نفسي ولازم حد يسمعني، وباخد أدوية نفسية من 30 سنة وبقول الحمد لله.

وتطرقت للحديث عن أحدث مسلسلاتها بعنوان تحت الحزام، وأوضحت: جبنا القصة من دكتور نفسي والشخصية لسة عايشة لغاية دلوقتي، واللي حصل في المسلسل هو اللي حصل بالتفصيل والوحيد اللي يعرف ده الدكتور النفسي ومقدرش يبلغ عنها، ولسة لغاية دلوقتي عايشة مع ابنها وحفيدها، وهي مش مصرية.

كواليس الزواج الأول لغادة عبدالرازق

وعن زيجاتها كشفت: اتجوزت صغيرة لأن كانت عقدتي نفسي أخرج، لأني كنت بشوف يسرية أختي مخطوبة وبتخرج فأنا عايزة أخرج، بابا كان قافل علينا أوي وهموت كان نفسي أخرج وأعرف شكل الديسكو ده إيه.

وأردفت: بابا روتانا كان مع أختي في الجامعة واتعرفنا على بعض في عيد ميلاد، قفش فيا وقفشت فيه علشان أخرج، وفي الطلاق ماما كانت أول مصيبة ليها إني قولت لها إني هتطلق من والد روتانا، ولما قولت لها إني هتطلق أغمى عليها وهي بتصلي، وكانت مرعوبة إنه ياخد روتانا، وهو قالي مش أنا ولا عيلتي اللي نحرم أم من بنتها.

غادة عبدالرازق استرجعت ذكريات مسلسل الحاج متولي، وأكدت: شخصية نعمة الله غيرت حياتي 180 درجة، والغوايش دي كانت بتاعة والدتي الله يرحمها، ومحدش كان مصدق إن أنا نفس الشخصية.

وعن زهرة وأزواجها الخمسة ومع سبق الإصرار أوضحت أنهما الأقرب لشخصيتها: كل اللي اتشاف على الشاشة في مسلسل زهرة مكنش مكتوب. حكاية حياة بهدلني خالص وقعدت حوالي 7 شهور مش عارفة أخرج من الشخصية، واللي دمرني بعده أكتر مسلسل الكابوس قعدت سنة علشان أخرج من الشخصية.