منة فضالي: رفضت أجمّد بويضاتي.. وبحب ارتبط برجالة أكبر مني في السن
منة فضالي: رفضت أجمد بويضاتي.. وبحب ارتبط برجالة أكبر مني في السن
قالت الفنانة منة فضالي، إنها اضطرت للارتباط من رجال أكبر منها سنًا بسبب ترك والدها لها، وهي في مرحلة الطفولة.
وتابعت فضالي، خلال لقائها مع الإعلامية أميرة بدر ببرنامج “VIP" على قناة “هي”: "بابا موجود ومش موجود، وكنت شايفة طول الوقت إنه مش موجود بإرادته، بزعل، اتعودت أبقى قوية وإني معتمدتش على حد، وكنت بدور في الارتباط على إني أرتبط بناس أكبر مني سنًا، كنت بدور على الأب في علاقاتي، وكنت مرتبطة بناس أكبر مني بـ 30 سنة، وبطلت دلوقت أدور عليه، عندي عماتي بيسألوا عليا وأعمامي بيكلموني طول الوقت ولكن مبنتقابلش باستمرار، وعندي عمة مفضلة بحبها، وعندي أخوات مسافرين برا مصر، وأخوات معرفش عنهم حاجة".
وتابعت: "أنا كبرت واتعودت أكون لوحدي، وبعد ما كبرت حسيت إني مش خسرانة، أمي تعبت وشقيت عشان تكبرني، وكنت بشوف ده، عندي صحابي بيتطلقوا قريب وقلتلهم متطلقوش عشان الأطفال هتدفع تمن ده محدش هيدفع التمن غيرهم، وهو مش حاسس إنه بيخسر ولاده وهيفتقد يشوفهم وهما بيكبروا، أي حد بيخسر ولاده في الوقت ده عمره ما هينفع يرجعهم تاني".
وأضافت: "شفت والدي لأول مرة وأنا عندي 21 سنة، وجالي عريس وقعد معاه وكان العريس عايش في أوروبا، وقالهم خدوها ومش عايز منكم أي حاجة وإحنا بنشتري راجل، وقال لأمي هما بيحبوا بعض وخلينا نخلص، ولما العريس حكالي قلتله مستحيل بابا يعمل كدا، قالي لأ قالي كدا، مستحيل أب يعمل كدا".
واستطردت: "لما بتفرج على فيلم أو مسلسل وبشوف مشاهد عن الأب بعيط، وأنا شخصية حساسة وكل حاجة بتأثر فيا، ومبحسش إني عايزة أكلمه، هو ميعرفش عني حاجة، دا بابا ناسي عيد ميلادي، عمري ما حسيت إنه عنده مشاعر تجاهي".
منة فضالي: في فرحي هلبس بدلة سموكين والعريس فستان
وزادت الفنانة منة فضالي، على حديثها أنها لم تقيم حفل زفاف في زيجتها الوحيدة، مشيرة إلى أنها ارتدت فستان الزفاف كثيرًا خلال أعمالها الفنية، إذ ارتدته لأكثر من 30 مرة.
وأكدت أنها لا تريد ارتداء أي فساتين للزفاف بسبب كثرة ارتدائها خلال أعمالها الفنية، معلقة: "لبست حوالي 30 فستان فرح، مش عايزة ألبس فستان فرح، زهقت"، لتتابع في سخرية: “بفكر لما آجي أتجوز ألبس بدلة سموكين، وألبس العريس هو الفستان".
وتحدثت الفنانة منة فضالي عن موقفها من الزواج، وهل لجأت لتجميد بويضاتها بسبب تأخيرها في الزواج حتى الآن، قائلة: "فكرت في فترة ما وكل الناس قالتلي أعمل تجميد بويضات، ولكن اتقالي بيأثر على الست، وأنا لسه مش عارفة هتجوز ولا لأ، وأنا صعب جدًا حد يتعامل معايا ومحدش عارفني كويس عشان يتعامل معايا، فبالتالي مبيستمروش، ولازم يعرفوا إيه اللي أنا بحبه قبل اللي بكرهه وهكذا".
واستكملت: "طبعا اتعرضت للخيانة ودي قصة معروفة، قفشته وحسيت إن فيه حاجة مش تمام ولقيت فضائح، أنا بحترم الراجل جدًا ومش ضده بل بالعكس، ودايمًا بشوف الراجل لما بيشوف واحدة على مراته يبقى العيب من الست أو هي اللي بتضطره أنه يبص برا أو عينه فارغة".
وأضافت: "أنا مسرفة جدًا ولازم اللي يجيلي يبقى جيبه مليان، وأنا ارتبطت بواحد مكنش معاه 3 آلاف جنيه في جيبه، وصرفت عليه فلوس كتير، ومكنتش ناصحة وكنت صغيرة، نبقى خارجين مثلا ويحصل موقف ويخلع بطريقة ما".
موضوعات متعلقة
