جوري بكر: متوقعتش إن عمرو دياب هيعرفني.. لكن "وداد" كانت وحشة أوي
تحدثت الفنانة جوري بكر، عن كواليس مسلسلها جعفر العمدة، كما أعربت عن سعادتها بلقائها بالهضبة ومعرفته باسمها، إذ نادى عليها منذ أيام في حفله الأخير.
وقالت جوري بكر، خلال لقائها في برنامج من مصر: “تشرفت بالعمل مع فتوح كان عايش الشخصية في طريقة، وكان متقمص الدور جدًا، وكنت مخضوضة منه، ومش قادره أقتنع إنه بنى آدم طبيعي، وكلنا كنا مبسوطين، وهو كان مصمم إنه إحنا نراجع المشاهد، ومحمد سامي المايسترو بتاع مسلسل جعفر العمدة، واتخضيت أول ما قرأت الورق، ومحمد سامي كان بيذاكرلي المشهد، وخلاني أثق في نفسي كممثلة”.
وتابعت جوري بكر: “أحمد فهيم كان رهيب، علاقتي معاه في المسلسل حسينا إن إحنا سيد ووداد، وكان بيبقى مركز تركيز رهيب، وكان بيساعدني بشكل كبير في المسلسل أنا عيطت بسبب مشهد سيد، وطلبوا من محمد سامي مشهد يجيبوا وداد من شعرها، ولو سبهم كان هيبقى دمار شامل، وهيضربوني بجد، وفي مشهد منذر رياحنه شدني من شعري جامد، وأكتر حاجة قاسيه تعملها مع بنى آدم تكون بخيل بمشاعرك”.
وعن مقابلتها لعمرو دياب، قالت جوري بكر: “في وسط حشد كبير عمرو دياب كان بيسلم على هالة صدقي، واتكسفت وقولت أكيد مش عارفني، وبعد كده قال اسمي، واتبسطت جدا إن عمرو دياب اتفرج على المسلسل وقال اسمي، ولازم اشكر جوزي حبيبي وكان حاسس إن هو هينادي اسمي، ووداد كانت وحشة أوي”.
