انتهت بالصلح.. القصة الكاملة لأزمة خالد الفايد مع هاني محروس

أعلن الفنان الشاب خالد الفايد، انتهاء الأزمة بينه وبين المنتج هاني محروس، حيث نشر خلال صفحته الشخصية على موقع التواصل الإجتماعي فيس بوك، قائلا: "الموضوع بيني وبين أستاذ هاني محروس اتحل وإن شاء الله مفيش أي حاجه وشكرا جدا لأستاذ هاني إنه تفهم الوضع وقال مفيش حاجه خلاص ومش هعمل أي حاجه وربنا يقدم الخير".
 

خالد الفايد يعلن الصلح مع المنتج هاني محروس

وأضاف خالد الفايد: "وإن شاء الله أكون في مصر خلال أيام ، وشكرا بجد إن صوتي وصل ولقينا حل مع أستاذ هاني محروس وشكرا للأستاذ سيد حجاج علي تدخله وحصل خير يا شباب، وأنا خلاص همسح البوستات اللي فاتت ".

وتابع؛"ادعولي ربنا يثبتني علي طريق الحق وإن شاء الله ف مصر لما انزل بيتي مفتوح لاي حد من أهلي وحبايبي اللي وقفوا جمبي ودعموني، وإن شاء الله أسجل القران الكريم كاملا بصوتي قريبا وأنزله عندي.. الحمد لله رب العالمين، والله بحبكم في الله ويشهد الله علي ما في قلبي من محبه ليكم".

خالد الفايد يرد على هجوم زوجة هاني محروس 

وكان الفنان الشاب المعتزل خالد الفايد، نجم برنامج ذا فويس، ردا على هجوم زوجة المنتج هاني محروس، مؤكدًا أنه طُرد في الشارع لمدة 3 أيام بعد اعتزاله الغناء.

وكتب خالد الفايد عبر حسابه بموقع فيسبوك: "أولا أنا مرضيتش أذكر ديانات أبدا في الموضوع ثانيا أنتي مراته وأكيد محموقه عليه وزعلانة، ثالثا البوستات اللي كان بيقولي امسحها كانت بوستات دينية وربنا شاهد لما كنت منزل بروفايل مكتوب فيه (محمد صلى الله عليه وسلم ) لقيته بيقولي مينفعش تنزل ده أمسحه ودا غلط".

خالد الفايد عبر فيسبوك
وواصل خالد الفايد:" رابعا أنا لما قلتله عاوز لبس علشان أنا فنان ومنظري لازم يكون كويس قالي حاضر، وجابلي كارتونة فيها لبس مهري وكوتشيات مقطعة، ولما زعلت راح مطلعلي ألف جنيه بيقولي خد اشتري لبس".

وأضاف خالد الفايد: خامسا أنا مكنتش قاعد في بيته ولا حاجه دي شقة الشركة اللي أنا كنت ماضي فيها وطبيعي كان من حقي اقعد فيها وهو لما أنا بطلت غناء طردني من الشقة، ومنع عني مصروفي وأنا كنت بايت ٣ أيام في الشارع وربنا شاهد على كلامي، ثم مين قال إني عايز العقد علشان أشتغل مع حد تاني؟ أنا لو عايز أنجح هيكون مع هاني محروس لأنه منتج شاطر وشركة تقيلة إنما أنا صدقت في توبتي لله عز وجل وأنا مش كداب زيكم ولا بعرف أكدب.

واختتم خالد الفايد، حديثه قائلا: سبحان الله هاني واللي معاه مش عارفين يردوا عليا بعد ما وضحت كل حاجة، راحت مراته منزله بوست بتشكك في مصداقية توبتي، علشان الناس بتدعمني وعلشان أنتوا واقفين جمبي وعلشان أنتوا أهل حق مترضوش أبدا بالغلط، وهما طالعين يشوهوا سمعتي ويشككوا في توبتي.

هجوم زوجة المنتج هاني محروس على خالد الفايد 

من جانبها ردت زوجة المنتج ومهندس الصوت هاني محروس عفاف جريس، على تصريحات خالد الفايد الأخيرة، بشأن تعرضه للتهديد من قبل زوجها، بعد اعتزاله الغناء كونه كان ملتزمًا معه بعقد وشرط جزائي ولم يلتزم بالمدة المحددة بالعقد.

ونشرت عفاف جريس عبر حسابها الشخصي بموقع فيس بوك، كشفت من خلاله العديد من التفاصيل حول علاقة هاني محروس بخالد الفايد، قائلة: "بما إن الموضوع انتشر وهاني محرج علينا إننا مانتكلمش، بس أنا مش هقدر لأن الكلام ده كبير ودخل في الديانات".

وأضافت عفاف جريس: "خالد الفايد إنت قبل ما تعتزل بنص ساعة كنت عايز عقدك إنت ومامتك وخالك، علشان زعلان من هاني إنه أول مرة يزعقلك علشان بتنزل بوستات هبلة وبيقولك إنت مشروع نجم لازم تاخد بالك من تصرفاتك وفيديوهاتك".

وتابعت عفاف جريس: "هاني محروس ده اللي قعدك في بيته في القاهرة سنتين و24 ساعة قاعد في الاستوديو معاه ومع فنانين مصر كلهم واعتبرك ابنه".

واستطردت زوجة هاني محروس: "شهادة حق اتحاسب عليها قدام ربنا، خالد كان عايز العقد علشان يشتغل لوحده ويبعد عن هاني، مش علشان يعتزل خالص ولما هاني قال لمامته أنا عامله ألبوم وصارف عليه  يمشي إزاي، لقي الدنيا مقفولة في وشه، وطلع من الاستوديو كتب الكلمتين  دول عنده على فيس بوك، وقال مش عايز حاجة من الدنيا، ومش عايز الفن والكلام اللي كتبه اتفهم  أنه اعتزل، وفي نص ساعة بقي  مصر كلها بتدعيله بالهداية وطبعا دي الحاجة الوحيدة  اللي مايقدرش يعترض عليها".

واختتمت عفاف جريس حديثها قائلة:" يعني من الآخر بوست صغير منه حكم على نفسه إنه أنهى طريق لسة ما بدأش فيه أصلا، وإحنا قلنا كعيلة مسيحية كل صحابنا وحبايبنا مسلمين أكيد ربنا كان كاتبله كده وربنا يعوض علينا الفلوس اللي اتصرفت عليه، وهو عيل صغير ويشيل شيلته ونسيناه خالص ولا بنهدده ولا فاكرينه أصلا، هاني محروس ابن أصول مفيش أجدع ولا أرجل ولا أكرم منه والدنيا كلها تشهد بده مش أنا بس".