مصطفى حشيش: المرأة مكانها البيت.. وأرفض دخول ابنتي مجال الفن لهذا السبب
حل الفنان مصطفى حشيش، ضيفاً مع الإعلامية ياسمين عز، في برنامجها كلام الناس، وكشف سبب اعتذاره عن المشاركة في مسلسل رمضان الماضي، قائلا: "اعتذرت عن مسلسل مع سهير رمزي رمضان الماضي لأن الدور غير مناسب لي ولمهنتي كأستاذ في الجامعة".
سبب رفض مصطفى حشيش الأعمال:
وأضاف: "أنا أستاذ جامعة ومش هينفع أقبل أشترك في دور أتضرب وأتهزق، وتاني يوم أقابل الطلاب بتوعي علشان كده بغيب كتير عن المشهد الفني لعدم مناسبة الأدوار التي تقدم لي".
وتابع: "في مطلع الثمانينات اشتغلت في أفلام المقاولات علشان أكوِّن نفسي وأعمل فلوس وكان في وقتها لازم أعمل كدا".
سر رفض مصطفى حشيش عمل المرأة:
وأشار: "مراتي ما بتشتغلش والمرأة مكانها البيت، وأنا ضد عمل المرأة إلا لو كانت مضطرة للشغل علشان تعول نفسها أو أولادها أو أبوها وأمها، أما لو ما كانتش مضطرة يبقى أنا ضد شغلها، احنا نسبة البطالة عندنا عالية والشباب بتوعنا قاعدين على القهاوي ما ينفعش نخليهم عرضة للمخدرات وجماعات العنف والتطرف لازم نوفر لهم وظائف بدلًا من تشغيل المرأة".
وأوضح مصطفى حشيش سبب عدم دخول ابنته مجال التمثيل، قائلاً: "أنا بنتي ستي وتاج راسي ومش عايزها تدخل مجال التمثيل علشان مجالنا بهدلة وأنا مش عايزها تبقى مقصرة في حق بيتها ولا زوجها".
ولفت: "عمري في حياتي ما شربت خمرة ومزاجي الوحيد كوباية القهوة السوداء، وأنا اللي بغسل شرابي بنفسي وأعمل القهوة لنفسي وأنا متعود أغسل شرابي بنفسي".
